ក្រសួងការបរទេសអាមេរិក បានអនុម័តការលក់យន្តហោះចម្បាំង F-35 Lightning II របស់ក្រុមហ៊ុន Lockheed Martin ទៅឱ្យអារ៉ាប៊ីសាអូឌីត ក្នុងតម្លៃប្រមាណ២៤.៣ ពាន់លានដុល្លារ។ ទោះជាយ៉ាងណា កិច្ចព្រមព្រៀងនេះនៅតែត្រូវការការអនុម័តពីសភាអាមេរិកជាមុនសិន។
ប្រភពពីសារព័ត៌មានReuter នៅថ្ងៃទី១៨ខែកញ្ញា។
កិច្ចព្រមព្រៀងដែលបានស្នើឡើង រួមមានយន្តហោះ F-35 ចំនួន ៤៨ គ្រឿង ម៉ាស៊ីន ៤៩ គ្រឿង ព្រមទាំងឧបករណ៍ទំនាក់ទំនង គ្រឿងបន្លាស់ និងសេវាគាំទ្រផ្សេងៗ។
អារ៉ាប៊ីសាអូឌីតបានចាប់អារម្មណ៍លើយន្តហោះ F-35 អស់រយៈពេលជាច្រើនឆ្នាំ ដើម្បីធ្វើទំនើបកម្មកងកម្លាំងអាកាស និងពង្រឹងសមត្ថភាពការពារប្រទេស ជាពិសេសចំពោះការគំរាមកំហែងពីអ៊ីរ៉ង់។
ការលក់នេះអាចបង្កឱ្យមានការពិភាក្សាអំពីគោលនយោបាយរបស់អាមេរិក ដែលមានគោលបំណងធានាឱ្យអ៊ីស្រាអែលរក្សាបាននូវ “ភាពលើសលប់ផ្នែកយោធាដែលមានគុណភាព” នៅក្នុងតំបន់មជ្ឈិមបូព៌ា។
ស្ថានទូតអារ៉ាប៊ីសាអូឌីតប្រចាំទីក្រុងវ៉ាស៊ីនតោន បានស្វាគមន៍ការលក់នេះ ដោយចាត់ទុកថា វាជាជំហានបន្ថែមក្នុងការពង្រឹងកិច្ចសហប្រតិបត្តិការការពារជាតិរវាងប្រទេសទាំងពីរ៕
