អគ្គលេខាធិការអង្គការសហប្រជាជាតិ លោក អង់តូនីយ៉ូ ហ្គូទែរ៉េស និងអគ្គលេខាធិការក្រុមប្រឹក្សាសហប្រតិបត្តិការឈូងសមុទ្រ (GCC) លោក Jasem Mohamed Albudaiwi បានថ្កោលទោសការវាយប្រហាររបស់ក្រុមហ៊ូទីលើប្រទេសអារ៉ាប៊ីសាអូឌីត។
ប្រភពពីសារព័ត៌មានAnadolu Agency នៅថ្ងៃទី២០ខែកញ្ញា។
មន្ត្រីទាំងពីរបាននិយាយថា ការវាយប្រហារដោយចេតនាទៅលើទីតាំងស៊ីវិល គឺជាការគំរាមកំហែងធ្ងន់ធ្ងរដល់សន្តិភាព និងសន្តិសុខក្នុងតំបន់។
ការជួបគ្នានេះធ្វើឡើងនៅទីក្រុងញូវយ៉ក ខណៈលោក Albudaiwi ចូលរួមកិច្ចប្រជុំមហាសន្និបាតអ.ស.ប។ ពួកគេក៏បានពិភាក្សាអំពីស្ថានការណ៍ក្នុងតំបន់ និងកិច្ចខិតខំប្រឹងប្រែងការទូត ដើម្បីស្វែងរកដំណោះស្រាយ។
កាលពីថ្ងៃសៅរ៍ អាជ្ញាធរការពារជនស៊ីវិលអារ៉ាប៊ីសាអូឌីតបានចេញការព្រមាននៅទីក្រុងរីយ៉ាដ និងតំបន់មួយចំនួនទៀត ប៉ុន្តែមិនបានរាយការណ៍ពីអ្នកស្លាប់ ឬការខូចខាតទេ។ កាលពីថ្ងៃព្រហស្បតិ៍ មនុស្សម្នាក់បានស្លាប់ និង២នាក់រងរបួស ដោយសារកម្ទេចកម្ទីពីយន្តហោះដ្រូនរបស់ហ៊ូទី ដែលត្រូវបានស្ទាក់បាញ់នៅលើតំបន់ Taif។
ក្រុមហ៊ូទីបានបន្តព្រមាន និងវាយប្រហារដោយមីស៊ីល និងដ្រូនលើអារ៉ាប៊ីសាអូឌីត ខណៈក្រុមនេះបានប្រកាសកាលពីថ្ងៃទី២០ ខែកក្កដា អំពី “ការបិទផ្លូវសមុទ្រ” ប្រឆាំងនឹងអារ៉ាប៊ីសាអូឌីត។
អារ៉ាប៊ីសាអូឌីតបានដឹកនាំសម្ព័ន្ធមិត្តមួយដែលគាំទ្ររដ្ឋាភិបាលយេម៉ែនប្រឆាំងនឹងក្រុមហ៊ូទី ចាប់តាំងពីឆ្នាំ២០១៥៕
