ចំនួននាវាដឹកទំនិញដែលឆ្លងកាត់ច្រកសមុទ្រ Hormuz បានធ្លាក់ចុះយ៉ាងខ្លាំង ខណៈភាពតានតឹងរវាងអាមេរិក និងអ៊ីរ៉ង់នៅតែបន្ត។ ទិន្នន័យដឹកជញ្ជូនបង្ហាញថា នៅចុងសប្តាហ៍កន្លងទៅ មាននាវាប្រហែល ១២គ្រឿង ឆ្លងកាត់ច្រកសមុទ្រនេះ ប្រៀបធៀបនឹង ៣៥គ្រឿង នៅចុងសប្តាហ៍មុន។
ប្រភពពីសារព័ត៌មានReuter នៅថ្ងៃទី២១ខែកញ្ញា។
មុនសង្គ្រាមចាប់ផ្តើមនៅថ្ងៃទី២៨ ខែកុម្ភៈ ច្រកសមុទ្រ Hormuz ធ្លាប់មាននាវាពាណិជ្ជកម្មធំៗប្រហែល ១២៥គ្រឿងក្នុងមួយថ្ងៃ ឆ្លងកាត់។ ច្រកសមុទ្រនេះក៏ជាផ្លូវសំខាន់សម្រាប់ដឹកជញ្ជូនប្រេង និងឧស្ម័នធម្មជាតិរាវប្រហែល មួយភាគប្រាំនៃពិភពលោក។
ទិន្នន័យពីក្រុមហ៊ុន Kpler បង្ហាញថា កាលពីថ្ងៃអាទិត្យ មាននាវា៤គ្រឿងចេញពីច្រកសមុទ្រ រួមមាននាវាដឹកផលិតផលប្រេង២គ្រឿង ខណៈនាវាដឹកប្រេងខ្នាតតូច២គ្រឿងចូលទៅក្នុងតំបន់ឈូងសមុទ្រ។ កាលពីថ្ងៃសៅរ៍ មាននាវា៥គ្រឿងចេញ ដោយដឹកផលិតផលកសិកម្ម ឧស្ម័ន LPG និងជីកសិកម្ម ហើយមាននាវាដឹកឧស្ម័នមួយគ្រឿងចូល។
ទោះបីចំនួននាវាដែលអាចតាមដានបានមានតិចក៏ដោយ ប្រទេសផលិតប្រេងនៅមជ្ឈិមបូព៌ានៅតែបន្តនាំចេញប្រេងតាមនាវាមួយចំនួនដែលបិទប្រព័ន្ធបញ្ជូនសញ្ញាតាមដាន៕
