នាយករដ្ឋមន្ត្រី និងរដ្ឋមន្ត្រីការបរទេសកាតា លោក Sheikh Mohammed bin Abdulrahman Al Thani បានអំពាវនាវឱ្យប្រទេសនៅតំបន់ឈូងសមុទ្រ និងអ៊ីរ៉ង់ បង្កើត ក្របខណ្ឌសន្តិសុខរួម ដោយផ្អែកលើកិច្ចសហប្រតិបត្តិការ ការគោរពអធិបតេយ្យភាព និងសន្តិសុខទៅវិញទៅមក។
ប្រភពពីសារព័ត៌មានAA news នៅថ្ងៃទី២១ខែកញ្ញា។
លោកបាននិយាយថា សង្គ្រាម និងវិបត្តិថ្មីៗនៅតំបន់គួរតែជាការ “ដាស់តឿន” ឱ្យប្រទេសក្នុងតំបន់យល់ថា ត្រូវធ្វើការជាមួយគ្នា ដើម្បីទប់ស្កាត់ការគំរាមកំហែង និងរក្សាសន្តិសុខ។
លោក Al Thani បានបញ្ជាក់ថា អ៊ីរ៉ង់ជាប្រទេសជិតខាងរបស់កាតា ដូច្នេះប្រទេសឈូងសមុទ្រត្រូវមានទំនាក់ទំនងល្អជាមួយអ៊ីរ៉ង់ ហើយអ៊ីរ៉ង់ក៏ត្រូវមានទំនាក់ទំនងល្អជាមួយប្រទេសទាំងនោះផងដែរ។
លោកក៏បានឱ្យដឹងថា កាតា និងប្រទេសដៃគូក្នុងតំបន់កំពុងធ្វើការឆ្ពោះទៅរកការរៀបចំក្របខណ្ឌសន្តិសុខនេះ ហើយកាតានឹងបន្ត សម្រុះសម្រួល និងរក្សាទំនាក់ទំនងការទូត ដើម្បីជួយបន្ថយភាពតានតឹង។
ជាមួយគ្នានេះ កាតាគ្រោងដាក់ដេញថ្លៃគម្រោងហេដ្ឋារចនាសម្ព័ន្ធប្រមាណ ៣៨.៥ ពាន់លានដុល្លារ ក្នុងរយៈពេល ៥ ឆ្នាំខាងមុខ ខណៈវិស័យអចលនទ្រព្យ និងបដិសណ្ឋារកិច្ចអាចទាក់ទាញការវិនិយោគឯកជនប្រមាណ ២២.៥ ពាន់លានដុល្លារ៕
