អង្គការសហប្រជាជាតិ (UN) បានថ្កោលទោសការវាយប្រហារឆ្លងព្រំដែនជាបន្តបន្ទាប់របស់ក្រុមហ៊ូទីនៅយេម៉ែន ទៅលើប្រទេសអារ៉ាប៊ីសាអូឌីត រួមទាំងការប៉ុនប៉ងវាយប្រហារទៅលើរដ្ឋធានីរីយ៉ាដ។
ប្រភពពីសារព័ត៌មានAA news នៅថ្ងៃទី២២ខែកញ្ញា។
អ្នកនាំពាក្យ UN លោក Stephane Dujarric បានបង្ហាញការព្រួយបារម្ភចំពោះការប្រយុទ្ធកាន់តែខ្លាំងនៅតំបន់ Taiz, Lahij និង Marib ដែលបង្កផលប៉ះពាល់ធ្ងន់ធ្ងរដល់ប្រជាជនស៊ីវិលនៅយេម៉ែន និងតំបន់ជុំវិញ។
លោកបាននិយាយថា ការវាយប្រហាររបស់ហ៊ូទីបានផ្តោតលើតំបន់ប្រជាជនស៊ីវិល និងហេដ្ឋារចនាសម្ព័ន្ធថាមពលសំខាន់ៗនៅអារ៉ាប៊ីសាអូឌីត។ UN បានអំពាវនាវឱ្យគ្រប់ភាគី បន្ថយភាពតានតឹង និងកុំឱ្យស្ថានការណ៍កាន់តែធ្ងន់ធ្ងរ។
សូមបញ្ជាក់ថា៖ ការវាយប្រហារថ្មីៗនេះក៏បានបណ្តាលឱ្យប្រជាជនស៊ីវិលរងរបួសនៅភាគខាងត្បូងអារ៉ាប៊ីសាអូឌីត ខណៈការប្រយុទ្ធនៅយេម៉ែនបានរំខានដល់ផ្លូវដឹកជញ្ជូនតាមសមុទ្រ និងធ្វើឱ្យប្រជាជនមួយចំនួនត្រូវភៀសខ្លួនពីលំនៅឋាន៕
