ប្រធានាធិបតីអ៊ីរ៉ង់ លោក Masoud Pezeshkian បានបញ្ជាក់ថា អ៊ីរ៉ង់មិនមានបំណងសម្លាប់ប្រធានាធិបតីអាមេរិក លោកDonald Trump ទេ ខណៈលោកកំពុងបំពេញទស្សនកិច្ចនៅទីក្រុងញូវយ៉ក ដើម្បីចូលរួមមហាសន្និបាតអង្គការសហប្រជាជាតិ (UN)។
ប្រភពពីសារព័ត៌មានCNN នៅថ្ថៃទី២៥ខែកញ្ញា។
លោក Pezeshkian បាននិយាយដូច្នេះក្នុងជំនួបជាមួយអ្នកសារព័ត៌មាននៅសណ្ឋាគារ Millennium Hilton កាលពីថ្ងៃព្រហស្បតិ៍។ លោកបានបដិសេធការចោទប្រកាន់របស់លោក Trump និងអាជ្ញាធរអាមេរិក ដែលថារដ្ឋាភិបាលអ៊ីរ៉ង់មានផែនការធ្វើឃាតលោក Trump។
ក្នុងជំនួបនេះ លោកក៏បាននិយាយអំពីសង្គ្រាមរវាងអ៊ីរ៉ង់ និងអាមេរិក កម្មវិធីនុយក្លេអ៊ែររបស់អ៊ីរ៉ង់ ការដាក់ទណ្ឌកម្មរបស់អាមេរិក និងបញ្ហាប្រឆាំងរដ្ឋាភិបាលនៅក្នុងប្រទេសអ៊ីរ៉ង់។
លោក Pezeshkian ក៏បានអះអាងថា ទណ្ឌកម្មអន្តរជាតិបានប៉ះពាល់ដល់ប្រជាជនអ៊ីរ៉ង់ ខណៈអ៊ីរ៉ង់នៅតែបន្តបដិសេធថាមានបំណងធ្វើឃាតលោក Trump៕
