ព្យុះPolo បាននាំមកនូវភ្លៀងធ្លាក់ខ្លាំងនៅតំបន់ឆ្នេរភាគខាងលិចប្រទេសម៉ិកស៊ិក នៅថ្ងៃទី២៥ ខែកញ្ញា ខណៈព្យុះ Nolo កំពុងឆ្ពោះទៅកោះហាវ៉ៃ។
ប្រភពពីសារព័ត៌មានAP នៅថ្ងៃទី២៥ខែកញ្ញា។
នៅទីក្រុងកំពង់ផែ Lázaro Cárdenas ទឹកសមុទ្របានជន់ចូលផ្ទះ និងតាមផ្លូវ។ ប្រជាជននៅតំបន់ឆ្នេរបានដាក់បាវខ្សាច់ការពារផ្ទះ និងហាង ហើយមួយចំនួនត្រូវបានជម្លៀសចេញពីតំបន់គ្រោះថ្នាក់។ អាជ្ញាធរបានព្រមានថា ភ្លៀងខ្លាំងអាចបង្កឱ្យមាន ទឹកជំនន់ និងការរអិលបាក់ដី។
ចំណែកព្យុះ Nolo បានក្លាយជាព្យុះសង្ឃរា ហើយត្រូវបានព្យាករថានឹងកាន់តែខ្លាំង ខណៈកំពុងបង្វែរទិសទៅកាន់កោះ Big Island របស់ហាវ៉ៃ។ តំបន់ខ្លះអាចមានភ្លៀងធ្លាក់រហូតដល់ 38–50 សង់ទីម៉ែត្រ ហើយអាចច្រើនជាងនេះ។ កោះ Maui ក៏ប្រឈមនឹងហានិភ័យទឹកជំនន់ដែលអាចបង្កគ្រោះថ្នាក់ដល់ជីវិត។
សូមបញ្ជាក់ថា៖ ព្យុះទាំងនេះកើតឡើងក្នុងពេលបាតុភូតអាកាសធាតុ El Niño កំពុងបង្កការផ្លាស់ប្តូរអាកាសធាតុនៅតំបន់ជាច្រើន ដោយធ្វើឱ្យតំបន់ខ្លះជួបគ្រោះរាំងស្ងួត និងតំបន់ខ្លះទៀតជួបទឹកជំនន់៕
