មេដឹកនាំសាសនាខ្ពស់បំផុតរបស់អារ៉ាប៊ីសាអូឌីត លោក Sheikh Saleh bin Fawzan Al-Fawzan បានអំពាវនាវដល់ទាហានដែលឈរជើងតាមព្រំដែន ឱ្យត្រៀមខ្លួនលះបង់ជីវិត ដើម្បីប្រយុទ្ធប្រឆាំងនឹងក្រុមហ៊ូធី ដែលគាំទ្រដោយអ៊ីរ៉ង់។
ប្រភពពីសារព័ត៌មានReuter នៅថ្ងៃទី២៥ខែកញ្ញា។
លោកបាននិយាយថា រដ្ឋាភិបាលយេម៉ែនដែលគាំទ្រដោយអារ៉ាប៊ីសាអូឌីត ត្រូវតែពង្រឹងអំណាចគ្រប់គ្រងលើទឹកដីទាំងមូលរបស់យេម៉ែន និងបណ្តេញក្រុមហ៊ូធីចេញពីអំណាច។
ការអំពាវនាវនេះកើតឡើង បន្ទាប់ពីមានការប្រយុទ្ធកាន់តែខ្លាំងក្នុងរយៈពេលប៉ុន្មានសប្តាហ៍ចុងក្រោយ ដោយក្រុមហ៊ូធីបានបាញ់មីស៊ីល និងបញ្ជូនដ្រូនវាយប្រហារទៅអារ៉ាប៊ីសាអូឌីត ខណៈអារ៉ាប៊ីសាអូឌីតបានឆ្លើយតបដោយការវាយប្រហារតាមអាកាស។
ក្រុមហ៊ូធីក៏បានដណ្តើមការគ្រប់គ្រងលើតំបន់ផ្លូវទឹក Bab el-Mandeb កាលពីប្រហែល២សប្តាហ៍មុន។ ស្ថានការណ៍នេះធ្វើឱ្យមានការព្រួយបារម្ភថា អារ៉ាប៊ីសាអូឌីតអាចបើកប្រតិបត្តិការយោធាទ្រង់ទ្រាយធំជាងមុននៅយេម៉ែន៕
