ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានឱ្យដឹងនៅថ្ងៃសុក្រទី២៥.០៩.២០២៦ថា សហរដ្ឋអាមេរិក បានស្នើឱ្យប្រទេសអេមីរ៉ាតអារ៉ាប់រួម (UAE) ធ្វើជាម្ចាស់ផ្ទះរៀបចំកិច្ចប្រជុំត្រីភាគីរវាងអ៊ុយក្រែន និងរុស្ស៊ី ដើម្បីពិភាក្សាអំពីកិច្ចខិតខំប្រឹងប្រែងបញ្ចប់សង្គ្រាមរយៈពេល ៤ឆ្នាំកន្លះ។
សារព័ត៌មាន Reuters។
ថ្លែងប្រាប់ក្រុមអ្នកសារព័ត៌មានតាមរយៈប្រព័ន្ធ WhatsApp លោក ហ្សេលេនស្គី បានបញ្ជាក់ថា ភាគីអាមេរិកបានស្នើឱ្យមានកិច្ចប្រជុំកម្រិតបច្ចេកទេសក្នុងទម្រង់ត្រីភាគី។
យើងកំពុងរង់ចាំសំណើពីអាមេរិកទាក់ទងនឹងកាលបរិច្ឆេទ ហើយអាមេរិកបានស្នើឱ្យជ្រើសរើសអេមីរ៉ាតអារ៉ាប់រួមជាទីតាំងដែលអាចទៅរួច។
ការលើកឡើងនេះ ធ្វើឡើងបន្ទាប់ពីលោក ហ្សេលេនស្គី បានជួបពិភាក្សាជាមួយប្រធានាធិបតីអាមេរិក លោក ដូណាល់ ត្រាំ នៅក្រៅកិច្ចប្រជុំមហាសន្និបាតUN ក្នុងទីក្រុងញូវយ៉ក ជុំវិញវិធីសាស្ត្របញ្ចប់ជម្លោះ។
លោក ហ្សេលេនស្គី បានបន្ថែមថា ក្រុមអ្នកចរចាអ៊ុយក្រែន បានជួបជាមួយសមភាគីអាមេរិក ដើម្បីពិភាក្សាអំពីព័ត៌មានលម្អិតជាក់លាក់ ដោយលោកបានគូសបញ្ជាក់ដូច្នេះថា យើងនឹងជម្រាបជូន និងពិភាក្សាអំពីព័ត៌មានលម្អិតទាំងនេះជាមួយភាគីអឺរ៉ុប ចំណែកឯអាមេរិកនឹងជជែកជាមួយរុស្ស៊ី ហើយយើងនឹងត្រឡប់មកវិញក្នុងរយៈពេល ១០ថ្ងៃ ជាមួយនឹងទស្សនវិស័យថ្មី ឬលទ្ធផលជាក់ស្តែងណាមួយ៕
