បុរសម្នាក់បានប្រាប់ទីភ្នាក់ងារព័ត៌មាន Anadolu កាលពីថ្ងៃអាទិត្យទី២៧.០៩.២០២៦ថា ក្រុមអ្នកតាំងទីលំនៅជនជាតិអ៊ីស្រាអែល ដែលមានអាវុធ បានវាយប្រហារផ្ទះរបស់ពលរដ្ឋអាមេរិក ដើមកំណើតប៉ាឡេស្ទីនម្នាក់ និងបានដុតបំផ្លាញរថយន្តចំនួន ៣គ្រឿង ក្នុងអំឡុងពេលនៃការវាយឆ្មក់នៅពេលយប់ លើភូមិមួយស្ថិតនៅភាគខាងកើតទីក្រុង Ramallah ក្នុងតំបន់វេសប៊ែង ដែលស្ថិតក្រោមការកាន់កាប់។
សារព័ត៌មានAnadolu។
លោក Mustafa Zaatar បាននិយាយថា ក្រុមអ្នកតាំងទីលំនៅជនជាតិអ៊ីស្រាអែល រាប់សិបនាក់បានចូលទៅក្នុងភូមិ Abu Falah នៅម៉ោងប្រហែល១:៣០ ព្រឹក ឡោមព័ទ្ធផ្ទះរបស់គាត់ និងបំផ្លាញទ្រព្យសម្បត្តិ មុនពេលដុតបំផ្លាញរថយន្តទាំងនោះ។
លោក Zaatar ថា គាត់បានមើលឃើញហេតុការណ៍វាយប្រហារនេះតាមរយៈកាមេរ៉ាសុវត្ថិភាព ដែលបានដំឡើងនៅជុំវិញផ្ទះ។
គាត់បន្ថែមថា៖ «ក្នុងរយៈពេលប្រហែល ១០នាទី យើងបានឃើញរថយន្តទាំងនោះឆេះឡើង»អ្នកភូមិបានចេញមកប្រឈមមុខនឹងក្រុមអ្នកតាំងទីលំនៅទាំងនោះ និងបានពន្លត់ភ្លើង ដោយបញ្ជាក់ថាអ្នកភូមិមានការភ័យខ្លាចចំពោះការត្រូវបានគេបាញ់ប្រហារ។
លោក Zaatar និយាយថា មានជនជាតិប៉ាឡេស្ទីន ២នាក់ត្រូវបានសម្លាប់ ក្នុងអំឡុងពេលនៃការវាយប្រហារដោយក្រុមអ្នកតាំងទីលំនៅជនជាតិអ៊ីស្រាអែលនៅក្នុងតំបន់ដដែលនេះកាលពីឆ្នាំមុន៕
