អាជ្ញាធរមូលដ្ឋាន បានឱ្យដឹងកាលពីថ្ងៃអាទិត្យទី២៧.០៩.២០២៦ថា ការវាយប្រហារដោយយន្តហោះគ្មានមនុស្សបើករបស់រុស្ស៊ី មកលើទីក្រុង Kyivរបស់អ៊ុយក្រែន បានសម្លាប់មនុស្សយ៉ាងហោចណាស់៣នាក់ និងរបួសជាង១០នាក់។
សារព័ត៌មានAnadolu។
យោងតាមការិយាល័យព្រះរាជអាជ្ញាតំបន់Kyiv យន្តហោះគ្មានមនុស្សបើកមួយគ្រឿង បានវាយប្រហារទៅលើផ្សារមួយនៅក្នុងភូមិ Sofiivska Borshchahivka។
ការវាយប្រហារទាំងនោះ ក៏បានបំផ្លាញយានយន្ត និងបង្កឱ្យមានអគ្គិភ័យនៅឃ្លាំងស្តុកទំនិញ និងអគារការិយាល័យមួយកន្លែងនៅក្នុងតំបន់នោះផងដែរ។
ប្រធានាធិបតីអ៊ុយក្រែន លោក Volodymyr Zelenskyy បានចោទប្រកាន់រុស្ស៊ីថា បានបញ្ជូនយន្តហោះគ្មានមនុស្សបើកសម្រាប់វាយប្រហារចំនួន២៧៧គ្រឿង ដែលមានប្រភេទផ្សេងៗគ្នា ចាប់តាំងពីថ្ងៃសៅរ៍មក។
ដោយថា ការវាយប្រហារទាំងនោះបានបំផ្លាញហេដ្ឋារចនាសម្ព័ន្ធស៊ីវិល និងសាធារណៈនៅទូទាំងប្រទេសអ៊ុយក្រែន រួមទាំងអគារមួយដែលត្រូវបានប្រើប្រាស់ជាលំនៅដ្ឋានរបស់ឯកអគ្គរដ្ឋទូតអារ៉ាប៊ីសាអូឌីតផងដែរ។
នៅក្នុងសេចក្តីថ្លែងការណ៍មួយនៅលើបណ្តាញសង្គម Xលោកបាននិយាយថា ការវាយប្រហារដោយយន្តហោះគ្មានមនុស្សបើកររបស់រុស្ស៊ីមកលើទីក្រុង Kyiv បាន«បំផ្លាញ» មត្តេយ្យសិក្សា សាលារៀន អគារលំនៅដ្ឋាន ហាងជួសជុលរថយន្ត ឃ្លាំងស្តុកទំនិញ និងហេដ្ឋារចនាសម្ព័ន្ធទូរគមនាគមន៍។
លោកបានមានប្រសាសន៍ថា៖ «រុស្ស៊ីមិនមានគោលដៅយោធាណាមួយឡើយក្នុងការធ្វើបែបនេះ វាគ្រាន់តែជាការប៉ុនប៉ងដើម្បីបំបាក់ស្មារតីប្រជាជន និងបង្កការខូចខាតឱ្យបានច្រើនបំផុតតាមដែលអាចធ្វើទៅបានដល់សង្គមរបស់យើងប៉ុណ្ណោះ»។
លោកបន្ថែមថា ការវាយប្រហារទាំងនោះក៏បានបំផ្លាញសាលាកីឡាមួយកន្លែងនៅទីក្រុង Dnipro និងមណ្ឌលកុមារកំព្រាមួយកន្លែងនៅក្នុងតំបន់ Sumy ផងដែរ។
លោក Zelenskyy បានលើកឡើងថា រុស្ស៊ីចេះបញ្ជូនសញ្ញាការទូតដែលពិភពលោកចង់ឮ ដើម្បីពន្យារពេលវិធានការអន្តរជាតិដ៏តឹងរ៉ឹងក្នុងការឆ្លើយតបទៅនឹងសង្គ្រាមនេះ។
លោកបានសង្កត់ធ្ងន់ថា៖ «ប្រសិនបើរុស្ស៊ីពិតជាកំពុងរៀបចំជំហានជាក់ស្តែងឆ្ពោះទៅរកការកាត់បន្ថយភាពតានតឹងមែន ដូចដែលខ្លួនបានអះអាង ជាពិសេសចំពោះអ្នកចរចាអាមេរិកនោះ រលកនៃការវាយប្រហារភេរវកម្មដោយប្រើប្រាស់យន្តហោះគ្មានមនុស្សបើកប្រភេទ ‘Shahed’ នេះនឹងមិនកើតឡើងឡើយ»។
លោកក៏បានជំរុញឱ្យដៃគូរបស់អ៊ុយក្រែនបង្កើនសម្ពាធលើទីក្រុងមូស្គូផងដែរ៕
