ប៉ូលីសបាននិយាយកាលពីថ្ងៃអាទិត្យទី ២៧ ខែកញ្ញា ឆ្នាំ២០២៦ថា ការតវ៉ារបស់និស្សិត បានប្រែក្លាយជាអំពើហិង្សា។
បន្ទាប់ពីក្រុមអ្នកតវ៉ា បានដុតរថយន្តនៅលើផ្លូវហាយវ៉េ១កន្លែង ក្នុងរដ្ឋ Punjab ភាគខាងជើងប្រទេសឥណ្ឌា។
ខណៈពួកគេបានបិទផ្លូវធំនោះ ដើម្បីតវ៉ាប្រឆាំងករណីចោទប្រកាន់ពីករណីចាប់រំលោភ។
ប៉ូលីសប្រើប្រាស់ដំបង និងគ្រាប់បែកផ្សែងបង្ហៀរទឹកភ្នែក ដើម្បីបំបែកក្រុមអ្នកតវ៉ា ដែលបានគប់ដុំថ្ម និងបិទផ្លូវហាយវ៉េ នៅក្នុងរដ្ឋនោះ។
ការចោទប្រកាន់មួយដែលមិនទាន់ត្រូវបានផ្ទៀងផ្ទាត់ ហើយបានផ្សព្វផ្សាយនៅលើបណ្តាញសង្គមអំពីករណីចាប់រំលោភ បានបង្កឱ្យមានការតវ៉ាកាលពីថ្ងៃសៅរ៍សប្តាហ៍កន្លងទៅនេះ នៅពេលដែលក្រុមនិស្សិតបានធ្វើបាតុកម្មប្រឆាំងនឹងអាជ្ញាធរសាកលវិទ្យាល័យ។
យោងតាមសេចក្តីរាយការណ៍របស់ប្រព័ន្ធផ្សព្វផ្សាយ បានឲ្យដឹងថា ការតវ៉ាបានចាប់ផ្តើបន្ទាប់ពីការបង្ហោះនៅលើបណ្តាញផ្សព្វផ្សាយសង្គមអំពីករណីចោទប្រកាន់ពីបទចាប់រំលោភនិស្សិតម្នាក់នៃសាកលវិទ្យាល័យ Lovely Professional University ក្នុងទីក្រុង Phagwara បានរាលដាលលើបណ្តាញសង្គមយ៉ាងឆាប់រហ័ស។
ហេតុការណ៍នេះបានកើតឡើងបន្ទាប់ពីមានករណីយុវតីម្នាក់ ត្រូវបានចាប់រំលោភ ដោយជនអន្ធពាលបីនាក់ក្លែងខ្លួន ក្នុងសួនច្បារមួយកន្លែងក្នុងរដ្ឋធានីរបស់ប្រទេសឥណ្ឌា៕
