កូរ៉េខាងជើងបានបដិសេធការចោទប្រកាន់របស់កូរ៉េខាងត្បូង ដែលថាមីនរបស់កូរ៉េខាងជើងបានបង្កការផ្ទុះចំនួន២លើក នៅតំបន់គ្មានយោធា (DMZ) កាលពីសប្តាហ៍មុន បណ្តាលឱ្យទាហានកូរ៉េខាងត្បូង ៣នាក់រងរបួស។
ប្រភពពីសារព័ត៌មានCNA នៅថ្ងៃទី៣០ខែកញ្ញា។
លោកស្រី Kim Yo Jong ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង Kim Jong Un បានចាត់ទុកការអះអាងរបស់កូរ៉េខាងត្បូងថា ជាការចោទប្រកាន់មិនពិត និងព្យាយាមបង្កើតភស្តុតាង ដើម្បីទម្លាក់កំហុសលើកូរ៉េខាងជើង។
ក្រសួងការពារជាតិកូរ៉េខាងត្បូងបាននិយាយថា ការស៊ើបអង្កេតរបស់ខ្លួនរកឃើញថា មានការសង្ស័យខ្ពស់ថា មីនរបស់កូរ៉េខាងជើងជាមូលហេតុនៃការផ្ទុះទាំងពីរ ហើយចាត់ទុកថា វាជាការរំលោភលើកិច្ចព្រមព្រៀងឈប់បាញ់។
កងទ័ពកូរ៉េខាងត្បូងក៏បានអំពាវនាវឱ្យកូរ៉េខាងជើងបញ្ឈប់ការពង្រឹងទីតាំងយោធានៅតាមព្រំដែនភ្លាមៗ ដោយព្រមានថា សកម្មភាពទាំងនេះអាចធ្វើឱ្យភាពតានតឹងនៅឧបទ្វីបកូរ៉េកាន់តែខ្លាំង៕
