ការតវ៉ារបស់សិស្សវិទ្យាល័យនៅប្រទេសបារាំងកាន់តែធ្ងន់ធ្ងរ ខណៈអាជ្ញាធរបានឃាត់ខ្លួនមនុស្សចំនួន៦២៥នាក់ និងប៉ូលិស-កងអាវុធហត្ថ៨៣នាក់រងរបួស ក្នុងការប៉ះទង្គិចកាលពីថ្ងៃពុធ។
ប្រភពពីសារព័ត៌មានAFP នៅថ្ងៃទី១ខែតុលា។
ការតវ៉ាបានចាប់ផ្តើមកាលពីសប្តាហ៍មុន នៅតំបន់ជុំវិញទីក្រុងប៉ារីស ហើយបានរាលដាលទៅទីក្រុងជាច្រើនទូទាំងប្រទេស។ សិស្សបានបិទផ្លូវចូលសាលា ដើម្បីតវ៉ាចំពោះ កាលវិភាគសិក្សាដែលធ្ងន់ ថ្នាក់រៀនមានសិស្សច្រើន កង្វះគ្រូ និងបន្ទប់រៀនក្តៅខ្លាំង ក្នុងអំឡុងរលកកម្ដៅ។
រដ្ឋមន្ត្រីមហាផ្ទៃ Laurent Nunez បាននិយាយថា កាលពីថ្ងៃពុធ ការតវ៉ាបានប៉ះពាល់ដល់ សាលាចំនួន ៣៥៦ ហើយមានការបោះវត្ថុដាក់កងកម្លាំងសន្តិសុខ ការប៉ះទង្គិច ការប្រើពាក្យប្រមាថ និងការប៉ុនប៉ងដុតភ្លើងនៅកន្លែងខ្លះ។
ចាប់តាំងពីការតវ៉ាចាប់ផ្តើម សិស្ស និងបុគ្គលិកសាលា ១១៩នាក់បានរងរបួស។ ទីក្រុងដែលរងផលប៉ះពាល់ខ្លាំងរួមមាន ប៉ារីស ប័រដូ លីយ៉ុង និងលីល ដោយនៅទីក្រុងលីល ប៉ូលិសបានប្រើឧស្ម័នបង្ហូរទឹកភ្នែក ដើម្បីបំបែកការប៉ះទង្គិច។
រដ្ឋមន្ត្រីអប់រំ Edouard Geffray បានអំពាវនាវឱ្យសិស្សអាចត្រឡប់ទៅរៀនវិញ ខណៈប្រធានាធិបតី Emmanuel Macron បានរិះគន់អ្នកនយោបាយខាងឆ្វេងជ្រុល ដែលលោកចោទថាកំពុងធ្វើឱ្យអំពើហិង្សាក្នុងការតវ៉ាមានភាពស្របច្បាប់៕
