ប្រធានាធិបតីតៃវ៉ាន់ Lai Ching-te បានប្រកាសថាមេបញ្ជាការជាន់ខ្ពស់ម្នាក់របស់កងទ័ពជើងទឹក ត្រូវបានផ្ទេរទៅកាន់កងឆ្មាំសមុទ្រ ដើម្បីពង្រឹងការសហការរវាងកងកម្លាំងទាំងពីរ ខណៈចិនបង្កើនសកម្មភាពតាមសមុទ្រជុំវិញតៃវ៉ាន់។
ប្រភពពីសារព័ត៌មានReuter នៅថ្ងៃទី១ខែតុលា។
មន្ត្រីជាន់ខ្ពស់ Yuan Sheng-hua ដែលធ្លាប់ជាអនុប្រធានសេនាធិការកងទ័ពជើងទឹក ត្រូវបានតែងតាំងជាអនុប្រធានកងឆ្មាំសមុទ្រ។ លោក Lai រំពឹងថា Yuan នឹងប្រើបទពិសោធន៍របស់ខ្លួន ដើម្បីពង្រឹងការសម្របសម្រួលរវាងកងទ័ពជើងទឹក និងកងឆ្មាំសមុទ្រ។
តៃវ៉ាន់កំពុងផ្តោតលើការពង្រឹងកងឆ្មាំសមុទ្រ ដោយចាត់ទុកថា នាវារបស់កងនេះអាចជួយកងទ័ពជើងទឹកជា «កងទ័ពជើងទឹកទី២» ប្រសិនបើមានសង្គ្រាម។ កាលពីខែមុន នាវាឆ្មាំសមុទ្រតៃវ៉ាន់ក៏បានបាញ់មីស៊ីលក្នុងការធ្វើសមយុទ្ធផងដែរ។
ចិនចាត់ទុកតៃវ៉ាន់ជាផ្នែកមួយនៃទឹកដីរបស់ខ្លួន ខណៈរដ្ឋាភិបាលតៃវ៉ាន់បដិសេធការអះអាងនេះ។ កងកម្លាំងចិនបានធ្វើសកម្មភាពជុំវិញកោះស្ទើររាល់ថ្ងៃ ហើយថ្មីៗនេះ កងឆ្មាំសមុទ្រចិនបានបង្កើនសកម្មភាពនៅតំបន់ឆ្នេរខាងកើតតៃវ៉ាន់៕
