អាជ្ញាធរអ៊ីស្រាអែលបានអនុម័តឱ្យក្រុមហ៊ុនអាកាសចរណ៍អ៊ីស្រាអែល បើកជើងហោះហើរទៅកាន់ទីក្រុងឌូបៃ ដើម្បីនាំអ្នកដំណើរប្រហែល ១,៨០០នាក់ ដែលជាប់នៅទីនោះ ត្រឡប់ទៅអ៊ីស្រាអែលវិញ បន្ទាប់ពីក្រុមហ៊ុន Flydubai ផ្អាកជើងហោះហើររវាងឌូបៃ និងអ៊ីស្រាអែល។
ប្រភពពីសារព័ត៌មានAA news នៅថ្ងៃទី២ខែតុលា។
ជើងហោះហើរនឹងចាប់ផ្តើមនៅថ្ងៃសុក្រ ពីឌូបៃទៅអាកាសយានដ្ឋាន Ben Gurion ជិតទីក្រុង Tel Aviv។ ក្រុមហ៊ុន El Al, Arkia និង Israir ត្រូវបានស្នើឱ្យដំណើរការជើងហោះហើរទាំងនេះ ដោយយន្តហោះនឹងហោះទៅឌូបៃដោយគ្មានអ្នកដំណើរ ហើយដឹកអ្នកដំណើរដែលជាប់នៅទីនោះត្រឡប់មកវិញ។
ក្រសួងដឹកជញ្ជូនអ៊ីស្រាអែលនិយាយថា រដ្ឋាភិបាលនឹងជួយសងថ្លៃចំណាយដល់ក្រុមហ៊ុនអាកាសចរណ៍ សម្រាប់ការហោះយន្តហោះទៅឌូបៃដោយគ្មានអ្នកដំណើរ ហើយស្នើឱ្យរក្សាតម្លៃសំបុត្រឱ្យសមរម្យ។
ការផ្អាកជើងហោះហើររបស់ Flydubai កើតឡើងបន្ទាប់ពីជើងហោះហើរ FZ1073 ពីឌូបៃទៅ Tel Aviv ត្រូវបង្វែរទិស និងចុះចតជាបន្ទាន់នៅទីក្រុង Tabuk ប្រទេសអារ៉ាប៊ីសាអូឌីត កាលពីថ្ងៃពុធ។ Flydubai បាននិយាយថា មានការឈ្លោះប្រកែកគ្នានៅក្នុងបន្ទប់បញ្ជាយន្តហោះ ហើយបុគ្គលិកបានចូលអន្តរាគមន៍ដើម្បីធានាសុវត្ថិភាពយន្តហោះ។
បន្ទាប់ពីហេតុការណ៍នេះ Flydubai បានផ្អាកជើងហោះហើរទៅ និងមកពីអ៊ីស្រាអែល ខណៈការស៊ើបអង្កេតកំពុងបន្ត។ ក្រុមការងារពីអេមីរ៉ាតអារ៉ាប់រួមបានចាប់ផ្តើមស៊ើបអង្កេតហេតុការណ៍នេះនៅថ្ងៃព្រហស្បតិ៍៕
