សម្ព័ន្ធដឹកនាំដោយអារ៉ាប៊ីសាអូឌីតបានប្រកាសថា នឹងបន្តគាំទ្ររដ្ឋាភិបាល និងកងកម្លាំងយេម៉ែន ក្នុងការស្តារស្ថាប័នរដ្ឋ និងដណ្តើមតំបន់ដែលក្រុមហ៊ូធីកាន់កាប់មកវិញ។
ប្រភពពីសារព័ត៌មានAA news នៅថ្ងៃទី៥ខែតុលា។
អ្នកនាំពាក្យសម្ព័ន្ធ លោក Turki al-Maliki បានចោទប្រកាន់ក្រុមហ៊ូធីថា បានបង្កការលំបាកដល់ប្រជាជនយេម៉ែន បង្ខំប្រជាជនឱ្យចាកចេញពីទីលំនៅ ប្រើប្រាស់ធនធានសម្រាប់សង្គ្រាម និងជ្រើសរើសកុមារចូលរួមក្នុងសកម្មភាពប្រយុទ្ធ។
លោកក៏បាននិយាយថា ក្រុមហ៊ូធីធ្លាប់វាយប្រហារទៅលើតំបន់នានារបស់អារ៉ាប៊ីសាអូឌីត និងគំរាមកំហែងដល់នាវាចរណ៍នៅសមុទ្រក្រហមភាគខាងត្បូង និងច្រកសមុទ្រ Bab el-Mandeb ដែលជាផ្លូវសំខាន់សម្រាប់ពាណិជ្ជកម្មអន្តរជាតិ។
នៅថ្ងៃអាទិត្យនេះ ប្រធានក្រុមប្រឹក្សាដឹកនាំប្រធានាធិបតីយេម៉ែន លោក Rashad al-Alimi បានប្រកាសចាប់ផ្តើមប្រតិបត្តិការយោធាទ្រង់ទ្រាយធំ ដើម្បីដណ្តើមទឹកដីដែលនៅសល់ពីក្រុមហ៊ូធី។ កងទ័ពយេម៉ែនក៏បានប្រកាសពីការចាប់ផ្តើមអ្វីដែលខ្លួនហៅថា «សមរភូមិរំដោះ» ដើម្បីស្តារស្ថាប័នរដ្ឋ និងបញ្ចប់ការគ្រប់គ្រងរបស់ក្រុមហ៊ូធី៕
