នៅថ្ងៃទី៥ ខែតុលា កងទ័ពអ៊ីស្រាអែលបានបាញ់សម្លាប់បុរសម្នាក់នៅភាគខាងត្បូងប្រទេសស៊ីរី ខណៈកងទ័ពអ៊ីស្រាអែលបន្តចូលក្នុងតំបន់នោះ។
ប្រភពពីសារព័ត៌មានAA news។
កងទ័ពអ៊ីស្រាអែលបានអះអាងថា បុរសនោះបានព្យាយាមចូលទៅក្នុងទីតាំងយោធារបស់ខ្លួន នៅក្នុងតំបន់ដែលអ៊ីស្រាអែលហៅថា «តំបន់សន្តិសុខ»។ ទាហានបានបាញ់សម្លាប់គាត់ ហើយអះអាងថា មិនមានទាហានអ៊ីស្រាអែលរងរបួសទេ។
មុននេះ កាលពីថ្ងៃអាទិត្យ សារព័ត៌មានស៊ីរីបានរាយការណ៍ថា កងកម្លាំងអ៊ីស្រាអែលបានចូលឆែកឆេរផ្ទះជាច្រើននៅតំបន់ Quneitra និងបានឃាត់ខ្លួនយុវជនម្នាក់នៅខាងក្រៅផ្ទះ។ កងទ័ពអ៊ីស្រាអែលក៏បានចូលភូមិ Maariya ក្នុងខេត្ត Daraa ដោយមានរថយន្តយោធាជាង ១៥គ្រឿង និងឆែកឆេរផ្ទះមួយចំនួន។
ប្រធានាធិបតីស៊ីរី Ahmad Al-Sharaa បានលើកឡើងនៅមហាសន្និបាតអង្គការសហប្រជាជាតិកាលពីខែមុនថា ចាប់តាំងពីចុងឆ្នាំ២០២៤ អ៊ីស្រាអែលបានធ្វើការវាយប្រហារតាមអាកាស និងកាំភ្លើងធំប្រមាណ ៥០០លើក ចូលក្នុងទឹកដីស៊ីរី និងមានការចូលប្រតិបត្តិការជាង ១,២០០លើក ព្រមទាំងការចាប់ខ្លួនប្រមាណ ៣០០នាក់៕
