មន្ត្រីនេប៉ាល់ បានឱ្យដឹងនៅថ្ងៃទី៥ ខែតុលា ឆ្នាំ២០២៦ថា ប្រទេសនេប៉ាល់ បានបញ្ចប់ប្រតិបត្តិការស្វែងរក និងជួយសង្គ្រោះ បើទោះបីជាមនុស្ស៥,២៨៥នាក់ នៅតែបាត់ខ្លួនក៏ដោយ ខណៈរាជរដ្ឋាភិបាល បានងាកមកផ្តោតលើការស្តារប្រទេសឡើងវិញ។
សារព័ត៌មានReuters។
គ្រោះទឹកជំនន់ដ៏ធ្ងន់ធ្ងរ នៅព្រំដែនប្រទេសនេប៉ាល់ជាមួយចិន កាលពីថ្ងៃទី ២៦ ខែសីហា ឆ្នាំ២០២៦ បានសម្លាប់មនុស្សយ៉ាងហោចណាស់ ១,៤៥៥នាក់ ខណៈមនុស្ស៥,២៨៥នាក់ នៅតែបាត់ខ្លួន។
ក្នុងនោះមនុស្សចំនួន១៣,៧៩៥ នាក់ផ្សេងទៀតត្រូវបានជួយសង្គ្រោះ។
លោក Phanindra Paudel ប្រធានមជ្ឈមណ្ឌលប្រតិបត្តិការសង្គ្រោះបន្ទាន់ជាតិ បានប្រាប់ទីភ្នាក់ងារព័ត៌មាន Reuters ថា៖យើងកំពុងផ្លាស់ប្តូរពីដំណាក់កាលស្វែងរក និងជួយសង្គ្រោះ ទៅជាដំណាក់កាលស្វែងរក និងស្តារឡើងវិញ។
លោកនិយាយថា អាជ្ញាធរកំពុងពិចារណាអំពីរបៀបប្រកាសជាផ្លូវការតាមផ្លូវច្បាប់ថា អ្នកដែលបាត់ខ្លួននោះបានស្លាប់ ដើម្បីអនុញ្ញាតឱ្យក្រុមគ្រួសារ ឬសាច់ញាតិរបស់ពួកគេអាចបំពេញបែបបទធានារ៉ាប់រង ធនាគារ និងនីតិវិធីច្បាប់ផ្សេងៗទៀតបាន។
លោក Paudel និយាយថា៖ យើងកំពុងចាប់ផ្តើមដំណើរការនីតិវិធីចាំបាច់នានា ដើម្បីបំពេញបែបបទផ្លូវច្បាប់ដែលតម្រូវឱ្យមាន។
លោក Dharam Raj Uprety ប្រធានអាជ្ញាធរជាតិគ្រប់គ្រង និងកាត់បន្ថយហានិភ័យគ្រោះមហន្តរាយ បាននិយាយថា អាជ្ញាធរនឹងលែងធ្វើការស្វែងរកសាកសពយ៉ាងសកម្មទៀតហើយ។
ប៉ុន្តែនឹងប្រមូលយកសាកសព ទ្រព្យសម្បត្តិ ឬរបស់មានតម្លៃផ្សេងទៀត ប្រសិនបើរកឃើញក្នុងអំឡុងពេលដំណើរការស្តារឡើងវិញ។
លោក Uprety បានបន្ថែមថា ប្រតិបត្តិការជួយសង្គ្រោះបន្ទាន់ នឹងនៅតែបន្តធ្វើឡើង ប្រសិនបើមានតម្រូវការ។
អាជ្ញាធរបានឱ្យដឹងថា ពួកគេត្រូវការថវិកាជិត ៥ពាន់លានដុល្លារអាមេរិក (ស្មើនឹង ៦,៤ពាន់លានដុល្លារសិង្ហបុរី) សម្រាប់ការស្តារឡើងវិញនៅដំណាក់កាលដំបូង និងការជួយដល់ប្រជាជនរាប់ពាន់នាក់ដែលត្រូវជម្លៀសចេញពីលំនៅឋានដោយសារទឹកជំនន់៕
