កងចម្រុះដឹកនាំដោយអារ៉ាប៊ីសាអូឌីត បានប្រកាសថា ខ្លួនបានបំផ្លាញឃ្លាំងមួយកន្លែងដែលផ្ទុកមីស៊ីលបាលីស្ទិកចំនួន២០គ្រាប់នៅតំបន់ភ្នំ ក្នុងខេត្តសាអាដា ភាគពាយ័ព្យប្រទេសយេម៉ែន។
ប្រភពពីសារព័ត៌មានAA news នៅថ្ងៃទី៦ខែតុលា។
កងចម្រុះក៏បាននិយាយថា ខ្លួនបានបំផ្លាញ ទីតាំងបាញ់មីស៊ីលបាលីស្ទិកមួយកន្លែង នៅទីក្រុងសាណា ដែលស្ថិតក្រោមការគ្រប់គ្រងរបស់ក្រុមហ៊ូធី។
ការវាយប្រហារនេះកើតឡើងមួយថ្ងៃបន្ទាប់ពីកងចម្រុះបានវាយប្រហារទីតាំងហ៊ូធីនៅខេត្តហូដៃដា ជាប់សមុទ្រក្រហម។ កងចម្រុះអះអាងថា បានបំផ្លាញឃ្លាំងអាវុធ ទីតាំងរក្សាទុកទូកផ្ទុកគ្រឿងផ្ទុះ និងមីនក្នុងសមុទ្រ ព្រមទាំងទប់ស្កាត់ផែនការវាយប្រហារលើផ្លូវនាវាចរណ៍នៅភាគខាងត្បូងសមុទ្រក្រហម។
យេម៉ែនបានជាប់ក្នុងសង្គ្រាមតាំងពីឆ្នាំ ២០១៤ បន្ទាប់ពីក្រុមហ៊ូធីដណ្តើមគ្រប់គ្រងទីក្រុងសាណា និងខេត្តជាច្រើន។ នៅឆ្នាំ ២០១៥ អារ៉ាប៊ីសាអូឌីតបានដឹកនាំកងចម្រុះចូលអន្តរាគមន៍ ដើម្បីគាំទ្ររដ្ឋាភិបាលដែលទទួលស្គាល់ដោយអន្តរជាតិ៕
