រដ្ឋញូវយ៉ករបស់សហរដ្ឋអាមេរិក បានប្រកាសអាសន្នគ្រោះមហន្តរាយ ដោយសារករណីជំងឺកញ្ជ្រឹលកំពុងកើនឡើង ខណៈជំងឺនេះកំពុងផ្ទុះឡើងវិញនៅតំបន់មួយចំនួនក្នុងសហរដ្ឋអាមេរិក។
ប្រភពពីសារព័ត៌មានAl Jazeera នៅថ្ងៃទី៦ខែតុលា។
អភិបាលរដ្ឋញូវយ៉ក លោកស្រី Kathy Hochul បានប្រកាសកាលពីថ្ងៃចន្ទថា លោកស្រីនឹងពង្រីកជាបណ្តោះអាសន្ននូវសិទ្ធិរបស់បុគ្គលិកសុខាភិបាល ក្នុងការផ្តល់វ៉ាក់សាំង MMR ដែលការពារជំងឺកញ្ជ្រឹល ស្រឡទែន និងស្អូច។
គិតត្រឹមថ្ងៃទី ៣ ខែតុលា រដ្ឋញូវយ៉កបានរកឃើញករណីកញ្ជ្រឹលចំនួន ១០៨ករណី ក្នុងឆ្នាំនេះ។ ក្នុងនោះ មាន ៧ករណីនៅទីក្រុងញូវយ៉ក និង ១០១ករណីនៅតំបន់ផ្សេងទៀត នៃរដ្ឋ។
ក្នុងចំណោមនោះ មាន ៩២ករណី ត្រូវបានរកឃើញចាប់ពីថ្ងៃទី១៥ ខែកក្កដា នៅតំបន់ជនបទមួយចំនួន ដែលមានអត្រាចាក់វ៉ាក់សាំងទាប។
សហរដ្ឋអាមេរិកធ្លាប់គ្រប់គ្រងជំងឺកញ្ជ្រឹលបានយ៉ាងល្អ រហូតដល់ជំងឺនេះត្រូវបានចាត់ទុកថា ត្រូវបានលុបបំបាត់ក្នុងឆ្នាំ ២០០០។ ប៉ុន្តែការធ្លាក់ចុះនៃអត្រាចាក់វ៉ាក់សាំងក្នុងប៉ុន្មានឆ្នាំចុងក្រោយ បានធ្វើឱ្យករណីជំងឺកញ្ជ្រឹល និងការផ្ទុះជំងឺកើនឡើងវិញនៅសហរដ្ឋអាមេរិក៕
