អ៊ីស្រាអែលបានបដិសេធមិនអនុញ្ញាតឱ្យតំណាង គណៈកម្មការបោះឆ្នោតកណ្តាលប៉ាឡេស្ទីន ចូលទៅកាន់តំបន់ហ្គាហ្សា និងហ្សេរុយសាឡឹមខាងកើត ដើម្បីត្រួតពិនិត្យការរៀបចំបោះឆ្នោតសភា ដែលគ្រោងធ្វើនៅថ្ងៃទី ២៨ ខែវិច្ឆិកា ឆ្នាំ២០២៦។
ប្រភពពីសារព័ត៌មានAA news ។
ប្រសិនបើការបោះឆ្នោតនេះអាចធ្វើបាន វានឹងក្លាយជាការបោះឆ្នោតសភាប៉ាឡេស្ទីនលើកដំបូង ចាប់តាំងពីឆ្នាំ ២០០៦។ គណៈកម្មការបោះឆ្នោតបានចាប់ផ្តើមទទួលពាក្យចុះឈ្មោះបញ្ជីបេក្ខជនតាំងពីថ្ងៃទី២៦ ខែកញ្ញា ហើយនឹងបន្តរហូតដល់ថ្ងៃទី១៣ ខែតុលា។
ប៉ាឡេស្ទីនប្រហែល ២.៩៧លាននាក់ មានសិទ្ធិបោះឆ្នោត រួមមានប្រហែល ១.៥៩លាននាក់នៅតំបន់ West Bank, ១.២៤លាននាក់នៅហ្គាហ្សា និង ១៤ម៉ឺននាក់ដែលមានអត្តសញ្ញាណប័ណ្ណហ្សេរុយសាឡឹម។
ការបោះឆ្នោតចុងក្រោយបានធ្វើឡើងក្នុងឆ្នាំ២០០៦ ដែលពេលនោះ Hamas ឈ្នះអាសនៈភាគច្រើន។ បន្ទាប់មកមានជម្លោះនយោបាយរវាង Hamas និង Fatah ហើយក្រុម Hamas បានគ្រប់គ្រងហ្គាហ្សា ខណៈអាជ្ញាធរប៉ាឡេស្ទីនដែលដឹកនាំដោយ Fatah បន្តគ្រប់គ្រង West Bank។
មន្ត្រីប៉ាឡេស្ទីនបាននិយាយថា ប្រសិនបើការបោះឆ្នោតត្រូវបានរារាំង ពួកគេអាចស្វែងរក ជម្រើសផ្សេង ដើម្បីបង្កើតក្រុមប្រឹក្សាជាតិប៉ាឡេស្ទីនតាមរយៈការឯកភាពគ្នា៕
