កងទ័ពអ៊ីស្រាអែលបានបាញ់កាំភ្លើងធំចំនួន២គ្រាប់ទៅតំបន់លើជាយភូមិ Al-Samdaniya Al-Sharqiya ក្នុងខេត្ត Quneitra ភាគខាងត្បូងប្រទេសស៊ីរី កាលពីយប់ថ្ងៃពុធ។
ប្រភពពីសារព័ត៌មានAA news នៅថ្ងៃទី៨ខែតុលា។
ទីភ្នាក់ងារព័ត៌មានផ្លូវការស៊ីរី SANA បានរាយការណ៍ថា គ្រាប់កាំភ្លើងបានធ្លាក់នៅតំបន់ដីកសិកម្ម ហើយ មិនមានអ្នករងរបួសទេ។
មួយថ្ងៃមុននេះ កងកម្លាំងអ៊ីស្រាអែលក៏បានចូលទៅក្នុងតំបន់ភាគខាងត្បូង Quneitra ចំនួន ២លើកផងដែរ។ ស៊ីរីបាននិយាយថា អ៊ីស្រាអែលបានធ្វើការបាញ់ផ្លោង និងចូលក្នុងទឹកដីភាគខាងត្បូងស៊ីរីជាបន្តបន្ទាប់ ចាប់តាំងពីរបប Bashar al-Assad ដួលរលំនៅខែធ្នូ ឆ្នាំ២០២៤។
រដ្ឋាភិបាលស៊ីរីបានទាមទារឱ្យកងទ័ពអ៊ីស្រាអែល ដកចេញពីទឹកដីស៊ីរី និងបានបញ្ជាក់ថា ខ្លួននៅតែគោរពកិច្ចព្រមព្រៀងផ្អាកការប្រឈមមុខគ្នា ឆ្នាំ១៩៧៤៕
