កាលពីថ្ងៃទី៨ ខែតុលា ឆ្នាំ២០២៦ កងទ័ពអ៊ីស្រាអែលបានប្រកាសថាទាហានរបស់ខ្លួនម្នាក់បានស្លាប់ និង៣នាក់ផ្សេងទៀតរងរបួសនៅភាគខាងត្បូងប្រទេសលីបង់ ខណៈអ៊ីស្រាអែលនៅតែបន្តវាយប្រហារលើតំបន់នានា ទោះបីប្រទេសទាំងពីរបានចុះកិច្ចព្រមព្រៀងក្របខណ្ឌក៏ដោយ។
ប្រភពពីសារព័ត៌មានAA news។
យោងតាមអាជ្ញាធរលីបង់ ចាប់តាំងពីថ្ងៃទី២ ខែមីនា មក ការវាយប្រហាររបស់អ៊ីស្រាអែលបានបណ្តាលឱ្យមនុស្សជាង ៤.៣៨០នាក់ស្លាប់ និងជាង ១២.៤១០នាក់រងរបួស។ ទាហានអ៊ីស្រាអែលដែលរងរបួសត្រូវបានបញ្ជូនទៅមន្ទីរពេទ្យដើម្បីព្យាបាល។
កាលពីថ្ងៃទី២៦ ខែមិថុនា ប្រទេសលីបង់ និងអ៊ីស្រាអែលបានចុះកិច្ចព្រមព្រៀងមួយនៅទីក្រុងវ៉ាស៊ីនតោន ក្រោមការសម្របសម្រួលរបស់សហរដ្ឋអាមេរិក។ កិច្ចព្រមព្រៀងនេះមានគោលបំណងឱ្យអ៊ីស្រាអែលដកកងទ័ពចេញពីទឹកដីលីបង់ជាបណ្តើរៗ និងដាក់ពង្រាយកងទ័ពលីបង់ទៅកាន់តំបន់ដែលអ៊ីស្រាអែលដកចេញ។
ទោះជាយ៉ាងណា អ៊ីស្រាអែលនៅតែបន្តវាយប្រហារលើភាគខាងត្បូងប្រទេសលីបង់ និងបន្តគ្រប់គ្រងតំបន់មួយចំនួនក្នុងទឹកដីលីបង់ បើទោះបីមានកិច្ចព្រមព្រៀងនេះក៏ដោយ៕
