ក្រសួងរតនាគារសហរដ្ឋអាមេរិក កាលពីថ្ងៃព្រហស្បតិ៍ ទី៨ ខែតុលា បានប្រកាសដាក់ទណ្ឌកម្មលើនាវាចំនួន១៧គ្រឿង ដែលពាក់ព័ន្ធនឹងបណ្តាញដឹកជញ្ជូនប្រេងសម្ងាត់របស់អ៊ីរ៉ង់ ដើម្បីបង្កើនសម្ពាធលើការនាំចេញប្រេងរបស់ប្រទេសនេះ។
ប្រភពពីសារព័ត៌មានAA news។
តាមក្រសួងរតនាគារអាមេរិក នាវាទាំងនេះបានដឹកជញ្ជូនប្រេងឆៅ ផលិតផលប្រេង និងផលិតផលគីមីឥន្ធនៈរបស់អ៊ីរ៉ង់ រាប់លានបារ៉ែលទៅកាន់ទីផ្សារនៅអាស៊ីខាងត្បូង និងអាស៊ីខាងកើត។ ការដាក់ទណ្ឌកម្មនេះក៏រួមមានក្រុមហ៊ុនដែលពាក់ព័ន្ធនឹងបណ្តាញដឹកជញ្ជូនទាំងនោះផងដែរ។
វិធានការនេះជាផ្នែកមួយនៃយុទ្ធនាការ «ប្រតិបត្តិការសេដ្ឋកិច្ចឯកោ» ដែលអាមេរិកបានចាប់ផ្តើមកាលពីថ្ងៃទី២៤ ខែសីហា ដើម្បីកាត់បន្ថយលទ្ធភាពរបស់អ៊ីរ៉ង់ក្នុងការប្រើប្រាស់បណ្តាញហិរញ្ញវត្ថុ និងពាណិជ្ជកម្មអន្តរជាតិ។ យុទ្ធនាការនេះក៏បានពង្រីកការដាក់ទណ្ឌកម្មទៅលើវិស័យដឹកជញ្ជូនតាមសមុទ្រ អាកាសចរណ៍ បច្ចេកវិទ្យា មាស និងទ្រព្យសកម្មឌីជីថលផងដែរ។
រដ្ឋមន្ត្រីរតនាគារអាមេរិក លោក ស្កុត បេសិន បានព្រមានថា ក្រុមហ៊ុន ឬអង្គភាពណាដែលជួយអ៊ីរ៉ង់គេចវេះពីទណ្ឌកម្ម អាចប្រឈមនឹងការកាត់ផ្តាច់ពីប្រព័ន្ធហិរញ្ញវត្ថុរបស់សហរដ្ឋអាមេរិក។
ទោះជាយ៉ាងណា ក្រសួងរតនាគារអាមេរិកក៏បានដកនាវា Hakuna Matata និង Pinochio ចេញពីបញ្ជីទណ្ឌកម្មផងដែរ បន្ទាប់ពីនាវាទាំងពីរបានចាកចេញពីបណ្តាញដឹកជញ្ជូនប្រេងសម្ងាត់ និងត្រូវបានលក់ទៅឱ្យប្រតិបត្តិករដែលមិនស្ថិតក្រោមទណ្ឌកម្ម៕
