សម្ព័ន្ធយោធាដឹកនាំដោយអារ៉ាប៊ីសាអូឌីតបានប្រកាសនៅព្រឹកថ្ងៃចន្ទ ទី១២ ខែតុលា ឆ្នាំ២០២៦ ថាកងកម្លាំងរបស់ខ្លួនបានស្ទាក់ចាប់និងបំផ្លាញមីស៊ីលផ្លោងមួយគ្រាប់ ដែលក្រុមហ៊ូទីបានបាញ់សំដៅទៅកាន់ទីក្រុង Khamis Mushait ភាគនិរតីនៃប្រទេសអារ៉ាប៊ីសាអូឌីត។
ប្រភពពីសារព័ត៌មានAA។
អ្នកនាំពាក្យសម្ព័ន្ធយោធា លោក Turki al-Maliki បានប្រកាសអំពីការស្ទាក់បំផ្លាញមីស៊ីលនេះតាមបណ្ដាញសង្គម X។ មុនពេលមានការប្រកាសនេះ អាជ្ញាធរការពារជនស៊ីវិលអារ៉ាប៊ីសាអូឌីតបានចេញសេចក្ដីព្រមាននៅទីក្រុង Abha ដែលនៅក្បែរនោះ ហើយក្រោយមកបានប្រកាសថា គ្រោះថ្នាក់បានផុតទៅហើយ។
ការស្ទាក់បំផ្លាញមីស៊ីលនេះកើតឡើង ខណៈក្រុមហ៊ូទីបន្តវាយប្រហារលើអារ៉ាប៊ីសាអូឌីត រួមទាំងការវាយប្រហារលើអាកាសយានដ្ឋានផងដែរ។
កាលពីថ្ងៃអាទិត្យ ការវាយប្រហារលើអាកាសយានដ្ឋានអន្តរជាតិ King Khalid ក្នុងទីក្រុងរីយ៉ាដ បានបណ្ដាលឱ្យពលរដ្ឋប៉ាគីស្ថានម្នាក់ស្លាប់ និង ១១នាក់រងរបួស។ ការវាយប្រហារនេះកើតឡើងមួយថ្ងៃបន្ទាប់ពីការវាយប្រហារមុនលើអាកាសយានដ្ឋានដដែល ដែលបណ្ដាលឱ្យមនុស្ស ១៣នាក់ស្លាប់ និងជាង ៣០០នាក់រងរបួស។
សម្ព័ន្ធយោធាដឹកនាំដោយអារ៉ាប៊ីសាអូឌីតបានចោទប្រកាន់ក្រុមហ៊ូទីថា ជាអ្នកនៅពីក្រោយការវាយប្រហារមុនៗ និងបានប្ដេជ្ញាឆ្លើយតបយ៉ាងម៉ឺងម៉ាត់ចំពោះការវាយប្រហារទាំងនេះ៕
