មន្ត្រីជាន់ខ្ពស់អ៊ីរ៉ង់ លោក Mohsen Rezaei បានចោទប្រកាន់មេបញ្ជាការបញ្ជាការដ្ឋានកណ្តាលអាមេរិក (CENTCOM) លោក Brad Cooper ថា បានដឹកនាំប្រតិបត្តិការរត់ពន្ធប្រេងនៅច្រកសមុទ្រ Hormuz ដោយមានជំនួយពីកងទ័ពអារ៉ាប់រួម (UAE)។
ប្រភពពីសារព័ត៌មានAA news។
លោក Rezaei បានថ្លែងក្នុងបទសម្ភាសន៍ជាមួយសារព័ត៌មានរដ្ឋអ៊ីរ៉ង់ Press TV ថា ប្រតិបត្តិការនេះប្រើប្រាស់ទូកតូចៗពី ៥ ទៅ ៦ គ្រឿង ដើម្បីផ្ទេរប្រេងទៅកាន់នាវាដឹកប្រេងធំៗ។ លោកអះអាងថា កងកម្លាំងអ៊ីរ៉ង់បានវាយប្រហារនាវាចំនួន ៥ ទៅ ៦ គ្រឿងដែលពាក់ព័ន្ធនឹងប្រតិបត្តិការនេះរៀងរាល់យប់ ក្នុងរយៈពេល ២ ទៅ ៣ ខែចុងក្រោយ។ រហូតមកដល់ពេលរាយការណ៍ អាមេរិក និងអារ៉ាប់រួមមិនទាន់ឆ្លើយតបចំពោះការចោទប្រកាន់នេះទេ។
លោក Rezaei ក៏បានច្រានចោលការលើកឡើងរបស់ប្រធានាធិបតីអាមេរិក លោក Donald Trump ដែលថា ច្រកសមុទ្រ Hormuz បានបើកដំណើរការឡើងវិញ ដោយអះអាងថា អ៊ីរ៉ង់នៅតែគ្រប់គ្រងផ្លូវទឹកយុទ្ធសាស្ត្រដ៏សំខាន់នេះ។ លោកបន្ថែមថា ចរាចរណ៍នាវានៅទីនោះនៅតែទាបជាងមុនសង្គ្រាមយ៉ាងខ្លាំង។
ជាមួយគ្នានេះ មន្ត្រីអ៊ីរ៉ង់រូបនេះបានព្រមានថា ប្រសិនបើអាមេរិកវាយប្រហារអ៊ីរ៉ង់ម្ដងទៀត អ៊ីរ៉ង់អាចកំណត់គោលដៅលើហេដ្ឋារចនាសម្ព័ន្ធបច្ចេកវិទ្យាដែលពាក់ព័ន្ធនឹងអាមេរិកនៅក្នុងតំបន់ រួមមានខ្សែកាបទំនាក់ទំនង មជ្ឈមណ្ឌលទិន្នន័យ និងមជ្ឈមណ្ឌលបច្ចេកវិទ្យាបញ្ញាសិប្បនិម្មិត (AI)។ លោកបានអះអាងថា ហេដ្ឋារចនាសម្ព័ន្ធទាំងនេះមានតម្លៃសរុបជាង ២ ទ្រីលានដុល្លារ។
លោកក៏បានបញ្ជាក់ថា អ៊ីរ៉ង់បានត្រៀមសមត្ថភាពយោធាថ្មីៗបន្ថែម ប្រសិនបើសង្គ្រាមផ្ទុះឡើងម្ដងទៀត។
គួរបញ្ជាក់ថា អាមេរិក និងអ៊ីស្រាអែលបានចាប់ផ្ដើមសង្គ្រាមប្រឆាំងអ៊ីរ៉ង់នៅថ្ងៃទី២៨ ខែកុម្ភៈ។ អ៊ីរ៉ង់បានឆ្លើយតបដោយការបាញ់មីស៊ីល និងយន្តហោះគ្មានមនុស្សបើកទៅកាន់តំបន់ជាច្រើន ហើយបានបិទច្រកសមុទ្រ Hormuz ស្ទើរតែទាំងស្រុង។ បន្ទាប់មក អាមេរិកបានដាក់ការបិទផ្លូវសមុទ្រលើកំពង់ផែអ៊ីរ៉ង់។ កាលពីខែមិថុនា ភាគីទាំងពីរបានចុះអនុស្សរណៈយោគយល់ស្ដីពីសេរីភាពនៃការធ្វើនាវាចរណ៍នៅច្រកសមុទ្រនេះ ប៉ុន្តែការអនុវត្តនៅតែជាប់គាំងដោយសារការខ្វែងគំនិតគ្នាលើបញ្ហាសន្តិសុខ៕
