កាលពីថ្ងៃអាទិត្យ ទី១១ ខែតុលា ឆ្នាំ២០២៦ អតីតទាហានលីបង់ម្នាក់បានស្លាប់ដោយសារការបាញ់កាំភ្លើងធំរបស់អ៊ីស្រាអែល ខណៈពេលកំពុងមើលថែដីរបស់ខ្លួនក្នុងរដូវប្រមូលផលអូលីវនៅភាគខាងត្បូងប្រទេសលីបង់។
ប្រភពពីសារព័ត៌មានAA news។
តាមការបញ្ជាក់របស់កងទ័ពលីបង់ ជនរងគ្រោះមានឈ្មោះ Ali Abdul Hassan Sweidan ជាអតីតមន្ត្រីយោធាដែលបានចូលនិវត្តន៍។ លោកត្រូវបានវាយប្រហារដោយផ្ទាល់ ខណៈកំពុងពិនិត្យមើលដីរបស់ខ្លួននៅតំបន់ Yater ក្នុងស្រុក Bint Jbeil។ ក្រោយមក កងទ័ពលីបង់បានទៅយកសពរបស់លោក។
កងទ័ពលីបង់បានថ្កោលទោសការវាយប្រហារនេះ ដោយចាត់ទុកថាជាការរំលោភយ៉ាងច្បាស់លាស់លើកិច្ចព្រមព្រៀងដែលមានស្រាប់ និងច្បាប់អន្តរជាតិ។
នៅថ្ងៃដដែលនោះ មនុស្សម្នាក់ទៀតបានស្លាប់ និងម្នាក់រងរបួស ដោយសារវត្ថុផ្ទុះដែលបន្សល់ទុកពីការវាយប្រហាររបស់អ៊ីស្រាអែលពីមុន បានផ្ទុះឡើងនៅតំបន់ Wadi al-Khanazir ក្បែរទីក្រុង Froun ក្នុងស្រុក Nabatieh ភាគខាងត្បូងលីបង់។
ក្រសួងសុខាភិបាលលីបង់បានឱ្យដឹងថា ចាប់តាំងពីអ៊ីស្រាអែលចាប់ផ្ដើមការវាយលុកលើលីបង់នៅថ្ងៃទី២ ខែមីនា មនុស្សចំនួន ៤.៣៨៦នាក់បានស្លាប់ និង ១២.៤១៣នាក់រងរបួស។
គួរបញ្ជាក់ថា កាលពីថ្ងៃទី២៦ ខែមិថុនា លីបង់ និងអ៊ីស្រាអែលបានចុះកិច្ចព្រមព្រៀងក្របខ័ណ្ឌមួយនៅទីក្រុងវ៉ាស៊ីនតោន សហរដ្ឋអាមេរិក ដោយមានអាមេរិកជាអ្នកសម្របសម្រួល។ កិច្ចព្រមព្រៀងនេះមានគោលបំណងឱ្យអ៊ីស្រាអែលដកកងទ័ពចេញពីទឹកដីលីបង់ជាបណ្ដើរៗ និងដាក់ពង្រាយកងទ័ពលីបង់ទៅកាន់តំបន់ដែលអ៊ីស្រាអែលដកចេញ។ ទោះជាយ៉ាងណា អ៊ីស្រាអែលនៅតែបន្តការវាយប្រហារ និងកាន់កាប់តំបន់មួយចំនួនក្នុងប្រទេសលីបង់៕
