កងទ័ពអាកាសអ៊ីរ៉ាក់បានប្រើយន្តហោះចម្បាំង F-16 ចំនួនពីរលើក ដើម្បីវាយប្រហារបំផ្លាញទីតាំងរបស់ក្រុម ISIS នៅខេត្ត Diyala ភាគខាងកើតប្រទេស កាលពីថ្ងៃអាទិត្យ ទី១១ ខែតុលា ឆ្នាំ២០២៦។
ប្រភពពីសារព័ត៌មានAA news។
តាមការបញ្ជាក់របស់មជ្ឈមណ្ឌលព័ត៌មានសន្តិសុខអ៊ីរ៉ាក់ ការវាយប្រហារបានធ្វើឡើងនៅតំបន់ Narin ដោយផ្អែកលើព័ត៌មានសម្ងាត់ដែលទទួលបានពីអង្គភាពស៊ើបការណ៍យោធា និងមានការសម្របសម្រួលជាមួយអង្គភាពឃ្លាំមើលដែនអាកាស។
អាជ្ញាធរអ៊ីរ៉ាក់បានបញ្ជាក់ថា ទីតាំងរបស់ក្រុម ISIS ត្រូវបានបំផ្លាញទាំងស្រុង ប៉ុន្តែមិនទាន់មានព័ត៌មានអំពីចំនួនអ្នកស្លាប់ និងរបួសនៅឡើយទេ។
ការវាយប្រហារនេះកើតឡើងមិនដល់ពីរសប្ដាហ៍ផង បន្ទាប់ពីបេសកកម្មរបស់សម្ព័ន្ធយោធាដឹកនាំដោយសហរដ្ឋអាមេរិក ដើម្បីប្រយុទ្ធប្រឆាំងនឹងក្រុម ISIS នៅអ៊ីរ៉ាក់ បានបញ្ចប់ជាផ្លូវការនៅថ្ងៃទី៣០ ខែកញ្ញា ឆ្នាំ២០២៦ ក្រោយដំណើរការអស់រយៈពេលជិត ១២ឆ្នាំ។
គួរបញ្ជាក់ថា អ៊ីរ៉ាក់បានប្រកាសជ័យជម្នះលើក្រុម ISIS នៅខែធ្នូ ឆ្នាំ២០១៧ បន្ទាប់ពីដណ្ដើមយកទឹកដីទាំងអស់ដែលក្រុមនេះធ្លាប់គ្រប់គ្រងបានមកវិញ។ ទោះជាយ៉ាងណា កងកម្លាំងអ៊ីរ៉ាក់នៅតែបន្តប្រតិបត្តិការប្រឆាំងនឹងសមាជិកក្រុមនេះដែលនៅសេសសល់៕
