តាមការស្ទង់មតិដែលចេញផ្សាយកាលពីថ្ងៃទី១២ ខែតុលា ឆ្នាំ២០២៦ គណបក្សប្រឆាំងនឹងនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ អាចទទួលបាន៦៧ អាសនៈ ខណៈក្រុមចម្រុះរដ្ឋាភិបាលរបស់លោកទទួលបាន៤៩អាសនៈ ក្នុងចំណោមអាសនៈសរុប ១២០ នៅក្នុងសភា។
ប្រភពពីសារព័ត៌មានAA news។
ការស្ទង់មតិរបស់ប៉ុស្តិ៍ទូរទស្សន៍ Channel 12 បានបង្ហាញថា គណបក្សរបស់លោក ហ្គាឌី អៃសិនខត អាចទទួលបាន ២៣ អាសនៈ ខណៈគណបក្សលីគូដរបស់លោក ណេតាន់យ៉ាហ៊ូ ទទួលបាន ២០ អាសនៈ។ ដើម្បីបង្កើតរដ្ឋាភិបាល គណបក្សឬក្រុមចម្រុះត្រូវការសំឡេងយ៉ាងតិច ៦១ អាសនៈ។
ចំពោះការគាំទ្រឱ្យកាន់តំណែងនាយករដ្ឋមន្ត្រី លោក អៃសិនខត នាំមុខលោក ណេតាន់យ៉ាហ៊ូ ក្នុងសំឡេងគាំទ្រ ៤៥% ទល់នឹង ៣៥%។ ចំណែកអតីតនាយករដ្ឋមន្ត្រី លោក ណាហ្វតាលី បេណេត ក៏ទទួលបានការគាំទ្រខ្ពស់ជាងលោក ណេតាន់យ៉ាហ៊ូ បន្តិចដែរ គឺ ៣៧% ទល់នឹង ៣៦%។
ការស្ទង់មតិនេះធ្វើឡើងលើមនុស្សចំនួន ៥០៩ នាក់ ដែលមានអាយុចាប់ពី ១៨ ឆ្នាំឡើងទៅ។ ការបោះឆ្នោតត្រូវបានកំណត់ឱ្យធ្វើឡើងនៅថ្ងៃទី២៧ ខែតុលា ឆ្នាំ២០២៦ ហើយប្រហែល ៨% នៃអ្នកឆ្លើយសំណួរនៅមិនទាន់សម្រេចចិត្តថានឹងបោះឆ្នោតឱ្យគណបក្សណានៅឡើយទេ។
លោក ណេតាន់យ៉ាហ៊ូ បានដឹកនាំរដ្ឋាភិបាលអ៊ីស្រាអែលតាំងពីចុងខែធ្នូ ឆ្នាំ២០២២។ លទ្ធផលស្ទង់មតិនេះបង្ហាញថា គណបក្សប្រឆាំងកំពុងមានប្រៀបមុនការបោះឆ្នោត ប៉ុន្តែលទ្ធផលចុងក្រោយនៅអាចប្រែប្រួលបាន៕
