កាសែតអាល្លឺម៉ង់taz ដែលមានមូលដ្ឋាននៅទីក្រុងប៊ែរឡាំង បានរិះគន់រដ្ឋាភិបាលអ៊ីស្រាអែលចំពោះការបដិសេធផ្តល់ទិដ្ឋាការការងារ និងការហាមឃាត់អ្នកឆ្លើយឆ្លងព័ត៌មានរបស់ខ្លួន គឺលោកស្រី សេរ៉េណា ប៊ីឡានឆេរី មិនឱ្យចូលប្រទេសអ៊ីស្រាអែល។
ប្រភពពីសារព័ត៌មានAA news នៅថ្ងៃទី១៣ខែតុលា។
កាសែតនេះបានចាត់ទុកការសម្រេចចិត្តរបស់អ៊ីស្រាអែលថា ជាការរំលោភបំពានយ៉ាងធ្ងន់ធ្ងរលើសេរីភាពសារព័ត៌មាន។ លោកស្រី ប៊ីឡានឆេរី បានរាយការណ៍ព័ត៌មានពីអ៊ីស្រាអែល និងដែនដីប៉ាឡេស្ទីនអស់រយៈពេលជាច្រើនឆ្នាំ ហើយបានក្លាយជាអ្នកឆ្លើយឆ្លងព័ត៌មានផ្លូវការរបស់កាសែតនេះចាប់តាំងពីខែមិថុនា ឆ្នាំ២០២៦។
យោងតាមសារព័ត៌មាន Israel National News អាជ្ញាធរអ៊ីស្រាអែលបានចោទប្រកាន់លោកស្រីថា បានអំពាវនាវឱ្យដាក់ទណ្ឌកម្មលើអ៊ីស្រាអែល តាមរយៈអត្ថបទចំនួនពីរដែលចុះផ្សាយក្នុងឆ្នាំ២០២៥។ អត្ថបទទាំងនោះបានលើកឡើងពីការតាំងទីលំនៅរបស់អ៊ីស្រាអែលនៅតំបន់វេសប៊ែង និងវិបត្តិមនុស្សធម៌នៅតំបន់ហ្គាហ្សា។
ទោះជាយ៉ាងណា លោកស្រី ប៊ីឡានឆេរី បានបដិសេធថា លោកស្រីមិនដែលអំពាវនាវឱ្យធ្វើពហិការអ៊ីស្រាអែលឡើយ។ លោកស្រីបានបញ្ជាក់ថា ការបញ្ចេញមតិ និងការរិះគន់ចំពោះសកម្មភាពរបស់រដ្ឋាភិបាល គឺជាផ្នែកមួយនៃការងាររបស់អ្នកសារព័ត៌មាន។
កាសែត taz បានអំពាវនាវឱ្យរដ្ឋាភិបាលអាល្លឺម៉ង់ជំរុញអ៊ីស្រាអែលឱ្យគោរពសិទ្ធិមនុស្ស សេរីភាពបញ្ចេញមតិ និងសេរីភាពសារព័ត៌មាន ព្រមទាំងអនុញ្ញាតឱ្យលោកស្រី ប៊ីឡានឆេរី ចូលប្រទេសវិញ ដើម្បីបន្តការងារដោយគ្មានការរឹតត្បិត។
គួរបញ្ជាក់ថា លោកស្រី ប៊ីឡានឆេរី មិនមែនជាអ្នកសារព័ត៌មានដំបូងគេដែលត្រូវបានអ៊ីស្រាអែលបដិសេធមិនឱ្យចូលប្រទេសចាប់តាំងពីឆ្នាំ២០២៥ នោះទេ។ មុននេះ អ្នកសារព័ត៌មានបារាំង អេស្ប៉ាញ និងអ៊ីតាលី ក៏ធ្លាប់ជួបប្រទះការរឹតត្បិតស្រដៀងគ្នានេះដែរ៕
