អង្គការសហប្រជាជាតិ (UN) បានជំរុញឱ្យប្រទេសកូឡុំប៊ីពន្លឿនការអនុវត្តកិច្ចព្រមព្រៀងសន្តិភាពឆ្នាំ២០១៦ ដោយព្រមានថា ការយឺតយ៉ាវ និងការកើនឡើងនៃក្រុមប្រដាប់អាវុធខុសច្បាប់ កំពុងគំរាមកំហែងដល់សន្តិភាពនៅតំបន់ដែលធ្លាប់រងជម្លោះ។
ប្រភពពីសារព័ត៌មានAA news នៅថ្ងៃទី១៣ខែតុលា។
លោក មីរ៉ូស្លាវ ជេនកា ប្រធានបេសកកម្មផ្ទៀងផ្ទាត់របស់អង្គការសហប្រជាជាតិនៅកូឡុំប៊ី បានថ្លែងទៅកាន់ក្រុមប្រឹក្សាសន្តិសុខ UN ថា កិច្ចព្រមព្រៀងនេះបានរួមចំណែកដល់ការកសាងសន្តិភាព ប៉ុន្តែការអនុវត្តនៅតែមានចំណុចខ្វះខាតជាច្រើន។
លោកបានបញ្ជាក់ថា ចាប់តាំងពីឆ្នាំ២០២១ មក ចំនួនសមាជិកក្រុមប្រដាប់អាវុធខុសច្បាប់នៅកូឡុំប៊ីបានកើនឡើងពីប្រហែល ១៥.០០០ នាក់ ដល់ ២៨.០០០ នាក់។ ក្នុងនោះ ក្រុម Gulf Clan មានអ្នកប្រយុទ្ធជាង ១០.០០០ នាក់។
ទន្ទឹមនឹងនេះ អតីតអ្នកប្រយុទ្ធជាង ១១.០០០ នាក់ កំពុងព្យាយាមចូលរួមរស់នៅក្នុងសង្គមស៊ីវិលវិញ តាមរយៈគម្រោងរកស៊ី និងសហករណ៍ផ្សេងៗ។ ប៉ុន្តែបញ្ហាសន្តិសុខ និងការរក្សាឱ្យអាជីវកម្មទាំងនេះដំណើរការបានយូរអង្វែង នៅតែជាឧបសគ្គសំខាន់។
ជាការឆ្លើយតប រដ្ឋមន្ត្រីការបរទេសកូឡុំប៊ី លោក អូម៉ា ប៊ូឡា អេស្កូបារ បានស្នើឱ្យកំណត់តួនាទីបេសកកម្ម UN ឱ្យផ្តោតជាចម្បងលើការធានាសន្តិសុខ និងការជួយអតីតសមាជិកក្រុមប្រដាប់អាវុធ FARC-EP ឱ្យត្រឡប់មករស់នៅក្នុងសង្គមវិញ។
លោកបានលើកឡើងថា ចន្លោះខែកក្កដា ឆ្នាំ២០១៦ ដល់ខែសីហា ឆ្នាំ២០២៦ កូឡុំប៊ីបានកត់ត្រាករណីឃាតកម្មចំនួន ១៣២.៩៣០ ករណី ករណីជំរិតទារប្រាក់ជិត ១០០.០០០ ករណី និងការចាប់ជំរិតមនុស្សជាង ២.៧៥០ ករណី។
លោកបានអះអាងថា ការកែទម្រង់តំបន់ជនបទគួរតែជាការងាររយៈពេលវែងរបស់រដ្ឋាភិបាលកូឡុំប៊ី ខណៈបេសកកម្ម UN គួរផ្តោតលើការធានាសន្តិសុខ និងការធ្វើសមាហរណកម្មអតីតអ្នកប្រយុទ្ធ។
ជម្លោះនេះបង្ហាញថា ទោះបីកូឡុំប៊ីបានចុះកិច្ចព្រមព្រៀងសន្តិភាពកាលពីឆ្នាំ២០១៦ ក៏ដោយ ក៏ប្រទេសនេះនៅតែប្រឈមនឹងបញ្ហាក្រុមប្រដាប់អាវុធខុសច្បាប់ និងការលំបាកក្នុងការរក្សាសន្តិភាពឱ្យបានយូរអង្វែង៕
