នៅថ្ងៃទី១៣ ខែតុលា ឆ្នាំ២០២៦ កងទ័ពរដ្ឋាភិបាលយេម៉ែនបានបើកការវាយប្រហារតាមអាកាសចំនួន៩លើកទៅលើក្រុមហ៊ូធីនៅខេត្តតៃស ភាគនិរតីរបស់ប្រទេសយេម៉ែន។ ការវាយប្រហារនេះមានគោលដៅលើកងកម្លាំង និងសម្ភារៈយោធារបស់ក្រុមហ៊ូធី ខណៈការប្រយុទ្ធគ្នារវាងភាគីទាំងពីរនៅតែបន្ត។
ប្រភពពីសារព័ត៌មានAA news។
អាជ្ញាធរយេម៉ែនបានឱ្យដឹងថា ជនស៊ីវិល ៦ នាក់ រួមទាំងក្មេងស្រីម្នាក់ បានស្លាប់ដោយសារការបាញ់ផ្លោងរបស់ក្រុមហ៊ូធីនៅតំបន់ជនបទនៃខេត្តតៃស។ ចំណែកនៅក្រុងតៃស មនុស្ស ១៧ នាក់ រួមទាំងស្ត្រី និងកុមារ បានរងរបួស ហើយផ្ទះចំនួន ៧ ខ្នងបានរងការខូចខាត។
យោងតាមអង្គការសហប្រជាជាតិ មនុស្សប្រមាណ ២១៦.០០០ នាក់បានបង្ខំចិត្តចាកចេញពីផ្ទះសម្បែង ចាប់តាំងពីខែសីហាមក ដោយសារការប្រយុទ្ធគ្នា។ ក្នុងចំណោមនេះ មានជាង ១៧២.០០០ នាក់មកពីខេត្តតៃស។ អង្គការសហប្រជាជាតិបានផ្តល់ជំនួយស្បៀងអាហារ សម្ភារៈអនាម័យ និងប្រាក់ជំនួយដល់មនុស្សប្រមាណ ១៤៣.០០០ នាក់។
បច្ចុប្បន្ន កងទ័ពរដ្ឋាភិបាលយេម៉ែនកំពុងបន្តប្រតិបត្តិការយោធា ដើម្បីដណ្តើមយកការគ្រប់គ្រងពីក្រុមហ៊ូធី ដែលកាន់កាប់រដ្ឋធានីសាណា និងតំបន់មួយចំនួននៅភាគខាងជើងប្រទេស។
សង្គ្រាមនៅយេម៉ែនបានចាប់ផ្តើមតាំងពីឆ្នាំ២០១៤ មក ហើយការប្រយុទ្ធគ្នាដែលកើនឡើងជាថ្មី បានធ្វើឱ្យប្រជាជនកាន់តែច្រើនប្រឈមនឹងការបាត់បង់ផ្ទះសម្បែង និងកង្វះខាតជំនួយចាំបាច់សម្រាប់ជីវិតប្រចាំថ្ងៃ៕
