ប្រទេសអ៊ីរ៉ង់បានប្រកាសថា ខ្លួនកំពុងពិនិត្យចម្លើយរបស់សហរដ្ឋអាមេរិកចំពោះសំណើរបស់អ៊ីរ៉ង់ ស្តីពីការបើកច្រកសមុទ្រហ័រមូសឡើងវិញ។ អ៊ីរ៉ង់នឹងផ្ញើចម្លើយទៅអាមេរិកតាមរយៈប្រទេសជាអ្នកសម្របសម្រួល បន្ទាប់ពីបញ្ចប់ការពិនិត្យ។ នេះបើតាមអ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei កាលពីថ្ងៃទី១២ ខែតុលា ឆ្នាំ២០២៦។
ប្រភពពីសារព័ត៌មានReuter។
លោកបានបញ្ជាក់ថា អ៊ីរ៉ង់នៅតែបន្តផ្លាស់ប្តូរសារជាមួយអាមេរិកតាមរយៈប្រទេសជាអ្នកសម្របសម្រួល ដូចជា កាតា និងប៉ាគីស្ថាន ដើម្បីស្វែងរកមធ្យោបាយបញ្ចប់សង្គ្រាមដែលបានចាប់ផ្តើមនៅថ្ងៃទី២៨ ខែកុម្ភៈ ឆ្នាំ២០២៦។
ទោះជាយ៉ាងណា ការចរចានៅតែជាប់គាំង ដោយសារអ៊ីរ៉ង់យល់ថា ចម្លើយរបស់អាមេរិកមិនបានឆ្លើយតបគ្រប់គ្រាន់ចំពោះលក្ខខណ្ឌចំនួន ៧ របស់ខ្លួន សម្រាប់ការបើកច្រកសមុទ្រហ័រមូសឡើងវិញ និងការវិលត្រឡប់ទៅកាន់តុចរចា។
ចំណុចខ្វែងគំនិតសំខាន់ គឺអាមេរិកចង់ឱ្យការចរចាផ្តោតលើកម្មវិធីនុយក្លេអ៊ែររបស់អ៊ីរ៉ង់តាំងពីដំបូង។ ប៉ុន្តែអ៊ីរ៉ង់ចង់ឱ្យភាគីទាំងពីរពិភាក្សាអំពីការបើកច្រកសមុទ្រហ័រមូសឡើងវិញ និងការធានាសន្តិសុខនៅតំបន់នោះជាមុនសិន។
សូមបញ្ជាក់ថា៖ ច្រកសមុទ្រហ័រមូសមានសារៈសំខាន់ចំពោះពាណិជ្ជកម្មថាមពលពិភពលោក ព្រោះមុនសង្គ្រាម ច្រកនេះជាផ្លូវដឹកជញ្ជូនប្រេង និងឧស្ម័នធម្មជាតិរាវប្រមាណមួយភាគប្រាំនៃពិភពលោក។
ពាក់ព័ន្ធនឹងជម្លោះរវាងអារ៉ាប៊ីសាអូឌីត និងក្រុមហ៊ូធីនៅយេម៉ែន លោក Baghaei បានបញ្ជាក់ថា អ៊ីរ៉ង់គាំទ្រការដោះស្រាយបញ្ហាតាមរយៈការសន្ទនា និងការចរចាដោយសន្តិវិធី។ លោកក៏បានអំពាវនាវឱ្យភាគីពាក់ព័ន្ធស្វែងរកកិច្ចព្រមព្រៀង ដើម្បីបញ្ចប់ជម្លោះនេះផងដែរ៕
