ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយកាលពីថ្ងៃអង្គារ ទី១៣ ខែតុលា ឆ្នាំ២០២៦ ថា អ៊ុយក្រែនមិនបានទទួលការព្រមានជាមុនពីប្រទេសដៃគូ អំពីការបាញ់មីស៊ីលរបស់រុស្ស៊ីទៅលើហេដ្ឋារចនាសម្ព័ន្ធថាមពលក្នុងទីក្រុងកៀវនោះទេ។
ប្រភពពីសារព័ត៌មានAA news។
លោកហ្សេលេនស្គីបានហៅការខ្វះការព្រមាននេះថា «អយុត្តិធម៌ជាខ្លាំង» និងអំពាវនាវឱ្យសហគមន៍អន្តរជាតិ ជាពិសេសសហរដ្ឋអាមេរិក បង្ហាញជំហរចំពោះការបន្តសង្គ្រាមនេះ។
លោកបានបញ្ជាក់ថា រោងចក្រផលិតអគ្គិសនី និងកម្តៅ Darnytsia ក្នុងទីក្រុងកៀវ ត្រូវបានវាយប្រហារ ហើយអគារស្នាក់នៅមួយក៏រងការខូចខាតផងដែរ។ ក្រុមសង្គ្រោះបន្ទាន់បានចុះទៅជួយពន្លត់ភ្លើង និងដោះស្រាយស្ថានការណ៍។
លោកហ្សេលេនស្គីបានអះអាងថា អ៊ុយក្រែនអាចរកឃើញមីស៊ីលទាំងនោះ នៅពេលដែលវាជិតទៅដល់ទីក្រុងកៀវប៉ុណ្ណោះ។ លោកក៏បានចោទប្រកាន់ថា រុស្ស៊ីកំពុងត្រៀមបាញ់មីស៊ីលបាលីស្ទិកបន្ថែមទៀត។
ការលើកឡើងនេះកើតឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសថា រុស្ស៊ី និងអ៊ុយក្រែនបានព្រមព្រៀងគ្នាឱ្យផ្អាកការវាយប្រហារលើហេដ្ឋារចនាសម្ព័ន្ធថាមពលរបស់គ្នាទៅវិញទៅមក។ ទោះជាយ៉ាងណា លោកហ្សេលេនស្គីបាននិយាយថា អ៊ុយក្រែនត្រៀមផ្អាកការវាយប្រហារលើរោងចក្រចម្រាញ់ប្រេងរបស់រុស្ស៊ី ប្រសិនបើទីក្រុងមូស្គូបញ្ឈប់ការវាយប្រហារលើហេដ្ឋារចនាសម្ព័ន្ធថាមពលរបស់អ៊ុយក្រែនជាមុន។
ចំណែកលោកត្រាំបានបញ្ជាក់ថា សហរដ្ឋអាមេរិកនៅតែចែករំលែកព័ត៌មានសម្ងាត់ជាមួយអ៊ុយក្រែន និងកំពុងធ្វើការជាមួយភាគីទាំងពីរ ដើម្បីស្វែងរកមធ្យោបាយបញ្ចប់សង្គ្រាម។ រីឯវិមានក្រឹមឡាំងបានឱ្យដឹងថា រុស្ស៊ីកំពុងបន្តទាក់ទងជាមួយទីក្រុងវ៉ាស៊ីនតោន អំពីលទ្ធភាពនៃការផ្អាកការវាយប្រហារលើវិស័យថាមពល៕
