អ្នកជំនាញអង្គការសហប្រជាជាតិ(UN) កាលពីថ្ងៃទី១៣ ខែតុលា ឆ្នាំ២០២៦ បានអំពាវនាវឱ្យអង្គការស្បៀងអាហារ និងកសិកម្មនៃអង្គការសហប្រជាជាតិ (FAO) គោរពសិទ្ធិមនុស្ស និងការពារបុគ្គលិកដែលធ្វើការលើបញ្ហាកង្វះស្បៀងអាហារ និងការអត់ឃ្លាននៅតំបន់ហ្គាហ្សា។
ប្រភពពីសារព័ត៌មានAA news។
អ្នកជំនាញបានសម្តែងការព្រួយបារម្ភចំពោះសេចក្តីថ្លែងការណ៍របស់អគ្គនាយក FAO ដែលហាក់ដូចជាភ្ជាប់ការចាកចេញរបស់មន្ត្រីជាន់ខ្ពស់មួយចំនួនទៅនឹងការងាររបស់ពួកគេលើបញ្ហាសិទ្ធិមនុស្ស។
ពួកគេបានបញ្ជាក់ថា ការកត់ត្រា និងរាយការណ៍អំពីស្ថានភាពអត់ឃ្លាននៅហ្គាហ្សា គឺស្របតាមបេសកកម្មរបស់ FAO ក្នុងការប្រយុទ្ធប្រឆាំងនឹងភាពអត់ឃ្លាន ហើយមិនមែនជាការបំពានលើគោលការណ៍អព្យាក្រឹតភាពរបស់អង្គការនោះទេ។
អ្នកជំនាញក៏បានព្រមានថា ការដាក់ទណ្ឌកម្ម ឬការគំរាមកំហែងចំពោះបុគ្គលិកដែលចូលរួមក្នុងការងារនេះ អាចធ្វើឱ្យបុគ្គលិកផ្សេងទៀតមានការភ័យខ្លាច និងប៉ះពាល់ដល់ភាពជឿជាក់របស់អង្គការសហប្រជាជាតិ។
ពួកគេបានជំរុញឱ្យ FAO គោរពធម្មនុញ្ញអង្គការសហប្រជាជាតិ និងឱ្យប្រទេសជាសមាជិកតាមដានការទទួលខុសត្រូវរបស់ថ្នាក់ដឹកនាំអង្គការនេះ។ ពួកគេក៏បានស្នើឱ្យដាក់ការគោរពសិទ្ធិមនុស្សជាលក្ខខណ្ឌសំខាន់ ក្នុងការជ្រើសរើសអគ្គនាយក FAO ថ្មីនៅឆ្នាំ២០២៧ ផងដែរ៕
