ក្រុមអ្នកជួយសង្គ្រោះបានបើកប្រតិបត្តិការស្វែងរកនាវិកចំនួន ៧នាក់ដែលបានបាត់ខ្លួន នៅថ្ងៃព្រហស្បតិ៍ទី១៥.១០.២០២៦។
បន្ទាប់ពីយន្តហោះដ្រូន បានវាយប្រហារលើនាវាដឹកប្រេងគីមីចំនួន ២គ្រឿង នៅក្បែរឆ្នេរសមុទ្រខ្មៅរបស់ប្រទេសរូម៉ានី។
សារព័ត៌មាន(Reuters)។
ការវាយប្រហារនេះ បានបង្កឱ្យមានអគ្គិភ័យឆាបឆេះនាវាទាំងនោះ និងបង្កើនក្តីបារម្ភថ្មីៗអំពីសន្តិសុខ នៅតាមបណ្តោយផ្លូវដឹកជញ្ជូនតាមសមុទ្រដ៏សំខាន់មួយ ដែលអ៊ុយក្រែនកំពុងប្រើប្រាស់។
លោក Nicusor Danប្រធានាធិបតីរូម៉ានី បានបញ្ជាក់ថា នាវាទាំង២ គ្រឿងត្រូវបានវាយប្រហារដោយយន្តហោះដ្រូន។
ប៉ុន្តែលោកមិនបានបញ្ជាក់ថា តើរុស្ស៊ី ជាអ្នកវាយប្រហារឬយ៉ាងណានោះទេ!។
លោក Dan បានប្រាប់អ្នកសារព័ត៌មាននៅទីក្រុងព្រុចសែល មុនពេលកិច្ចប្រជុំកំពូលរបស់មេដឹកនាំសហភាពអឺរ៉ុប (EU) ថា៖«យន្តហោះដ្រូនចំនួន២ គ្រឿងបានវាយប្រហារលើនាវាទាំងនោះ»។
លោកបានបន្ថែមថា ប្រទេសរូម៉ានី កំពុងស្ថិតក្នុងដំណាក់កាលប្រមូលព័ត៌មាននៅឡើយ ដោយហេតុការណ៍នេះទើបតែបានកើតឡើងកាលពីប៉ុន្មានម៉ោងមុនប៉ុណ្ណោះ។
លោកបានបន្ថែមទៀតថា៖ នឹងមានប្រតិកម្មឆ្លើយតបពីសំណាក់រដ្ឋរូម៉ានី។
នាវាទាំង ២ គ្រឿងនេះបានចតនៅជិតមាត់ព្រែក Sulina ដែលតភ្ជាប់ទៅកាន់ទន្លេ Danube។
នេះគឺជាផ្លូវនាំចេញដ៏សំខាន់មួយដែលអ៊ុយក្រែនប្រើប្រាស់ ខណៈដែលរុស្ស៊ីបានវាយប្រហារម្តងហើយម្តងទៀតលើកំពង់ផែរបស់អ៊ុយក្រែននៅសមុទ្រខ្មៅ។ នាវាមួយគ្រឿងស្ថិតនៅក្នុងដែនទឹករបស់រូម៉ានី ចំណែកឯនាវាមួយគ្រឿងទៀតស្ថិតនៅខាងក្រៅដែនទឹកនោះបន្តិច។
នាវិកដែលបាត់ខ្លួនគឺជាផ្នែកមួយនៃនាវិកសរុប១២នាក់ នៅលើនាវាដឹកប្រេងគីមីឈ្មោះ Wine Trader ដែលចុះបញ្ជីនៅប្រទេស San Marino។
នាវានេះត្រូវបានវាយប្រហារនៅចម្ងាយ ១៣ ម៉ាយសមុទ្រភាគអាគ្នេយ៍នៃព្រែក Sulina ដែលស្ថិតនៅចម្ងាយ ១ម៉ាយសមុទ្រពីខាងក្រៅដែនទឹករបស់រូម៉ានី។ មន្ត្រីរូម៉ានីបានឱ្យដឹងថា នាវិកចំនួន ៥ នាក់ត្រូវបានជួយសង្គ្រោះ។
ចំណែកនាវាទី២ គឺនាវាដឹកប្រេងគីមី និងប្រេងឥន្ធនៈឈ្មោះ Yara J ដែលចុះបញ្ជីនៅប្រទេស Comoros បានឆាបឆេះបន្ទាប់ពីត្រូវបានវាយប្រហារនៅចម្ងាយ ៨ទៅ ១០ម៉ាយភាគអាគ្នេយ៍នៃតំបន់ Sulina ក្នុងដែនទឹករបស់រូម៉ានី កាលពីយប់ថ្ងៃពុធ នាវិកទាំងអស់មានសុវត្ថិភាព។
ការវាយប្រហារទាំងនេះគឺជាហេតុការណ៍ចុងក្រោយបំផុត នៅក្នុងស៊េរីនៃការវាយប្រហារលើនាវាពាណិជ្ជកម្មនៅតំបន់ភាគខាងលិចនៃសមុទ្រខ្មៅ។
ក្នុងរយៈពេល ១០ថ្ងៃចុងក្រោយនេះ នាវាដឹកទំនិញយ៉ាងហោចណាស់៥ គ្រឿងផ្សេងទៀតត្រូវបានវាយប្រហារនៅក្បែរឆ្នេរសមុទ្រនៃប្រទេសរូម៉ានី និងប្រទេសប៊ុលហ្គារី (ដែលជាសមាជិកអង្គការណាតូ NATO)៕
