មន្ត្រីជាន់ខ្ពស់អង្គការសហប្រជាជាតិ (UN)មួយរូប បានព្រមានកាលពីថ្ងៃព្រហស្បតិ៍ទី១៥.១០.២០២៦ថា ស្ថានភាពនៅក្នុងតំបន់ហ្គាហ្សា និងតំបន់វេសប៊ែង (West Bank) ដែលកំពុងស្ថិតក្រោមការកាន់កាប់។
គឺមានភាពផុយស្រួយក្នុងកម្រិតគ្រោះថ្នាក់ ដោយលោកបានសង្កត់ធ្ងន់ថា ត្រូវតែជៀសវាងឱ្យបានដាច់ខាតនូវការវិលត្រឡប់ទៅរកសង្គ្រាមវិញ។
សារព័ត៌មានAnadolu។
នៅក្នុងការរាយការណ៍ជូនក្រុមប្រឹក្សាសន្តិសុខអង្គការសហប្រជាជាតិអំពីបញ្ហាប៉ាឡេស្ទីន។
លោក Ramiz Alakbarov ដែលជាអ្នកសម្របសម្រួលពិសេសស្តីពីដំណើរការសន្តិភាពនៅមជ្ឈិមបូព៌ារបស់អង្គការសហប្រជាជាតិ បានលើកឡើងពីខួបនៃព្រឹត្តិការណ៍ថ្ងៃទី៧ ខែតុលា ដោយបញ្ជាក់ថា ទាំងប្រជាជនប៉ាឡេស្ទីន និងអ៊ីស្រាអែល សុទ្ធតែត្រូវការទស្សនវិស័យនយោបាយមួយសម្រាប់អនាគត។
លោកមានប្រសាសន៍ថា៖ ប្រជាជនប៉ាឡេស្ទីន និងអ៊ីស្រាអែល សមនឹងទទួលបានអ្វីដែលលើសពីដំណោះស្រាយរយៈពេលខ្លី។
ពួកគេសមនឹងទទួលបានមាគ៌ាដ៏គួរឱ្យជឿជាក់មួយឆ្ពោះទៅរកសន្តិភាព និងទីបំផុតគឺការបញ្ចប់ជម្លោះនេះ។ សហគមន៍អន្តរជាតិត្រូវតែធ្វើឱ្យលើសពីការគ្រាន់តែនិយាយ ហើយចាត់វិធានការជាក់ស្តែង ដើម្បីធានាបាននូវអនាគតប្រកបដោយសន្តិសុខ និងសេចក្តីថ្លៃថ្នូរសម្រាប់ប្រជាជន។ ដល់ពេលហើយដែលត្រូវវិលត្រឡប់ទៅរកដំណើរការសន្តិភាពដ៏ពិតប្រាកដមួយ។
ងាកមកនិយាយអំពីតំបន់ហ្គាហ្សា លោក Alakbarov បានកត់សម្គាល់ថា រយៈពេលមួយឆ្នាំបានកន្លងផុតទៅហើយចាប់តាំងពីការឈប់បាញ់បានចូលជាធរមាន។ លោកបាននិយាយថា៖ «ទោះបីជាមានវឌ្ឍនភាពខ្លះៗក៏ដោយ ប៉ុន្តែស្ថានភាពនៅតែមានភាពផុយស្រួយយ៉ាងខ្លាំង»។
លោកលើកឡើងថា ប្រតិបត្តិការយោធារបស់អ៊ីស្រាអែលនៅតែបន្ត ដែល «បណ្តាលឱ្យមានអ្នកស្លាប់ប្រហែល ១.៥០០ នាក់ ក្នុងនោះរួមមានកុមារជាង ៣២០ នាក់»។
លោក Alakbarov បានពណ៌នាអំពីស្ថានភាពគ្រួសារនានានៅក្នុងតំបន់ហ្គាហ្សា ដែលកំពុងរស់នៅក្នុងតង់ចាស់ៗទ្រុឌទ្រោម នៅក្នុងទីតាំងជម្លៀសខ្លួនដែលមានមនុស្សណែនតាន់តាប់ ឬនៅក្នុងអគារដែលរងការខូចខាតយ៉ាងធ្ងន់ធ្ងរ ខណៈដែលប្រព័ន្ធទឹក និងអនាម័យត្រូវបានបំផ្លិចបំផ្លាញ។ លោកបាននិយាយថា៖«ប្រជាជនភាគច្រើននៅក្នុងតំបន់ហ្គាហ្សា នៅតែរស់នៅក្នុងភាពងងឹត»៕
