សេវាសង្គ្រោះបន្ទាន់រដ្ឋនៃប្រទេសអ៊ុយក្រែន(SES) បានរាយការណ៍ថា ការវាយប្រហារដោយមីស៊ីលរបស់រុស្ស៊ីទៅលើទីក្រុង Kharkiv កាលពីយប់ថ្ងៃសុក្រទី១៦ ខែតុលា បណ្តាលឱ្យមនុស្ស១៥នាក់រងរបួស ក្នុងនោះមានកុមារ ៣នាក់ ព្រមទាំងបានបង្កការខូចខាតដល់អគារលំនៅឋានខ្ពស់ៗ និងហេដ្ឋារចនាសម្ព័ន្ធឃ្លាំងស្តុកទំនិញ។
សារព័ត៌មានKyiv post ។
យោងតាមក្រុមឆ្លើយតបគ្រោះអាសន្ន កងកម្លាំងរុស្ស៊ី បានបាញ់មីស៊ីលសំដៅទៅលើសង្កាត់ Nemyshlianskyi នៃទីក្រុងនេះ ដោយមានមីស៊ីលមួយគ្រាប់បានធ្លាក់ចំឃ្លាំងស្តុកទំនិញពាណិជ្ជកម្មមួយកន្លែង។
ការផ្ទុះនេះបានបង្កជាអគ្គិភ័យឆាបឆេះលើផ្ទៃដីទំហំ១០០ ម៉ែត្រការ៉េ និងបានធ្វើឱ្យខូចខាតដល់រចនាសម្ព័ន្ធនៃអគារលំនៅឋានពហុជាន់ និងសំណង់ផ្សេងៗទៀតដែលនៅក្បែរនោះ។
សរុបមក ការវាយប្រហារនេះបានបង្កឱ្យមានអគ្គិភ័យចំនួន៤ កន្លែងផ្សេងគ្នា។
ក្រុមពន្លត់អគ្គិភ័យជំនាញ និងក្រុមសង្គ្រោះមកពីសេវាសង្គ្រោះបន្ទាន់រដ្ឋ (DSNS) បានគ្រប់គ្រង និងពន្លត់អគ្គិភ័យទាំង៤ កន្លែងនោះបានទាំងស្រុង ក្នុងអំឡុងពេលប្រតិបត្តិការពេញមួយយប់។
បុគ្គលិកពេទ្យ និងក្រុមឆ្លើយតបគ្រោះអាសន្នបានផ្តល់ការព្យាបាលដល់ជនស៊ីវិលចំនួន១៥ នាក់ដែលរងរបួស ទាំងនៅកន្លែងកើតហេតុ និងនៅតាមមន្ទីរពេទ្យក្នុងទីក្រុង ដោយបញ្ជាក់ថា ក្នុងចំណោមអ្នករងរបួសទាំងនោះ មានកុមារចំនួន ៣នាក់៕
