សម្ព័ន្ធភាពដឹកនាំដោយអារ៉ាប៊ីសាអូឌីត បានប្រកាសនៅព្រឹកថ្ងៃអាទិត្យទី១៨.១០.២០២៦ថា ខ្លួនបានស្ទាក់ចាប់ និងបំផ្លាញមីស៊ីលផ្លោងចំនួន២ គ្រាប់ ដែលបាញ់ចេញដោយក្រុមហ៊ូទីរបស់ប្រទេសយេម៉ែន ឆ្ពោះទៅកាន់ទីក្រុង Khamis Mushait នៅភាគនិរតីនៃប្រទេសអារ៉ាប៊ីសាអូឌីត។
សារព័ត៌មានAnadolu។
លោក Turki al-Maliki អ្នកនាំពាក្យនៃសម្ព័ន្ធភាពនេះ បានប្រកាសអំពីការស្ទាក់ចាប់ខាងលើ តាមរយៈបណ្តាញសង្គម X។
ទីភ្នាក់ងារការពារស៊ីវិលរបស់អារ៉ាប៊ីសាអូឌីត បានចេញការជូនដំណឹងអំពី «គ្រោះថ្នាក់ដែលអាចកើតមាន» នៅក្នុងរដ្ឋធានី Riyadh និងទីក្រុង Abha ព្រមទាំងទីក្រុង Khamis Mushait នៅភាគនិរតី ដោយប្រើប្រាស់ប្រព័ន្ធជូនដំណឹងជាមុនថ្នាក់ជាតិរបស់ខ្លួន។
ក្រោយមក ទីភ្នាក់ងារនេះបានប្រកាសថា គ្រោះថ្នាក់នោះបានកន្លងផុតទៅហើយ។
កាលពីថ្ងៃសៅរ៍ លោក al-Maliki បានឱ្យដឹងថា កងកម្លាំងសម្ព័ន្ធភាពបានស្ទាក់ចាប់ និងបំផ្លាញយន្តហោះគ្មានមនុស្សបើក (drone) ចំនួន ៤ គ្រឿង ក្នុងរយៈពេលប៉ុន្មានម៉ោង នៅតំបន់ Riyadh ខេត្តភាគខាងកើត (Eastern Province) និងភាគខាងត្បូងនៃប្រទេសអារ៉ាប៊ីសាអូឌីត។
សម្ព័ន្ធភាពនេះក៏បានបញ្ចេញវីដេអូមួយ ដែលអះអាងថាបង្ហាញពីការវាយប្រហារបំផ្លាញឧបករណ៍បាញ់មីស៊ីលផ្លោងចំនួន ២ គ្រឿង នៅតំបន់ Saada ភាគខាងជើងប្រទេសយេម៉ែន បន្ទាប់ពីឧបករណ៍ទាំងនោះត្រូវបានប្រើប្រាស់ដើម្បីបាញ់មីស៊ីលឆ្ពោះទៅកាន់ប្រទេសអារ៉ាប៊ីសាអូឌីត។
ព្រឹត្តិការណ៍ទាំងនេះបានកើតឡើង ខណៈពេលដែលមានការកើនឡើងនៃភាពតានតឹងផ្នែកយោធាជាបន្តបន្ទាប់ រវាងប្រទេសអារ៉ាប៊ីសាអូឌីត និងក្រុមហ៊ូទីរបស់យេម៉ែន ចាប់តាំងពីខែកក្កដាមក រួមទាំងការវាយប្រហារទៅលើហេដ្ឋារចនាសម្ព័ន្ធអាកាសចរណ៍ស៊ីវិល និងហេដ្ឋារចនាសម្ព័ន្ធថាមពលនៅក្នុងប្រទេសអារ៉ាប៊ីសាអូឌីតផងដែរ។
ចាប់តាំងពីខែមីនា ឆ្នាំ ២០១៥ មក ប្រទេសអារ៉ាប៊ីសាអូឌីត បានដឹកនាំសម្ព័ន្ធភាពយោធាមួយ ដើម្បីគាំទ្ររដ្ឋាភិបាលយេម៉ែន ដែលត្រូវបានទទួលស្គាល់ជាអន្តរជាតិ ក្នុងការប្រយុទ្ធប្រឆាំងនឹងក្រុមហ៊ូទី ដែលបានគ្រប់គ្រងរដ្ឋធានី Sanaa និងខេត្តផ្សេងៗទៀត ចាប់តាំងពីខែកញ្ញា ឆ្នាំ ២០១៤មក៕
