រដ្ឋមន្ត្រីក្រសួងការពារជាតិអាមេរិក លោក Pete Hegseth បានថ្លែងកាលពីថ្ងៃសៅរ៍ទី១៧.១០.២០២៦ថា អ៊ីរ៉ង់កំពុងប្រឈមមុខ នឹងជម្រើសមួយ គឺរវាងការបោះបង់ចោល«មហិច្ឆតានុយក្លេអ៊ែរ» របស់ខ្លួនដើម្បីឈានដល់កិច្ចព្រមព្រៀងមួយ ឬត្រូវប្រឈមមុខនឹងសកម្មភាពយោធាដែលបង្កឱ្យមានការបំផ្លិចបំផ្លាញយ៉ាងធ្ងន់ធ្ងរ។
សារព័ត៌មានAnadolu។
លោក Hegseth បានប្រាប់ក្រុមសិក្ខាកាមនៃកម្មវិធីបណ្តុះបណ្តាលនាយទាហានបម្រុង (ROTC) និងអ្នកដែលទើបចូលបម្រើកងទ័ព នៅឯសាកលវិទ្យាល័យ Tennessee ថា៖«អ៊ីរ៉ង់នឹងត្រូវធ្វើការសម្រេចចិត្តយ៉ាងឆាប់រហ័សថា តើពួកគេនឹងបោះបង់ចោលមហិច្ឆតាទាំងនោះតាមរយៈការចរចា ឬត្រូវប្រឈមមុខនឹងការបំផ្លិចបំផ្លាញ ដែលសហរដ្ឋអាមេរិកអាចបង្កឡើង ហើយនឹងធ្វើឡើងយ៉ាងឆាប់រហ័ស ប្រសិនបើចាំបាច់»។
លោកចោទប្រកាន់ទីក្រុងតេអេរ៉ង់ថា បានកសាងឃ្លាំងអាវុធមីស៊ីលធម្មតា (conventional missiles) យ៉ាងច្រើនសន្ធឹកសន្ធាប់ ដើម្បីរារាំងសកម្មភាពយោធា។
ខណៈពេលដែលខ្លួននៅតែបន្តដេញតាម«មហិច្ឆតានុយក្លេអ៊ែរ»។
លោកបានអះអាងថា កម្លាំងយោធារបស់សហរដ្ឋអាមេរិក គឺជាកត្តាចាំបាច់ក្នុងការបង្ខំឱ្យគូប្រជែងយល់ព្រមចរចា។
លោក Hegseth ក៏បានលើកឡើងដែរថា អ៊ីរ៉ង់ «ផ្តល់ហិរញ្ញប្បទានដល់ក្រុមតំណាង (proxies) របស់ខ្លួន គឺក្រុម Hezbollah និងក្រុម Houthi នៅក្នុងប្រទេសយេម៉ែន»ដោយបន្ថែមថា ទីក្រុងវ៉ាស៊ីនតោនបានព្យាយាមទប់ស្កាត់ការវាយប្រហារលើកងកម្លាំងអាមេរិក និងនាវាចរណ៍នានា។
ប្រមុខការពារជាតិរូបនេះ បានពន្យល់ថា គោលនយោបាយចំពោះអ៊ីរ៉ង់ គឺជាផ្នែកមួយនៃកិច្ចខិតខំប្រឹងប្រែងដ៏ទូលំទូលាយរបស់ប្រធានាធិបតីអាមេរិក លោក Donald Trump ក្នុងការស្តារអំណាចរបស់សហរដ្ឋអាមេរិកឡើងវិញ ដែលរួមមានទាំងការប្រឆាំងនឹងបណ្តាញឧក្រិដ្ឋកម្មគ្រឿងញៀន និងការកម្រិតឥទ្ធិពលរបស់អ៊ីរ៉ង់ ចិន និងរុស្ស៊ី នៅតំបន់អាមេរិកឡាទីន។
ដោយលើកឡើងពីប្រទេសវេណេស៊ុយអេឡា លោក Hegseth បាននិយាយថា ប្រតិបត្តិការរបស់សហរដ្ឋអាមេរិកនៅទីនោះ នឹងមាន «ផលប៉ះពាល់យូរអង្វែងដល់មនុស្សជំនាន់ក្រោយ» ដោយលោកបានពណ៌នាប្រទេសនេះថាជាដៃគូយុទ្ធសាស្ត្រមួយ និងបានគូសបញ្ជាក់ពីធនធានប្រេងរបស់ប្រទេសនេះ។
លោកបន្ថែមថា ទីក្រុងវ៉ាស៊ីនតោនកំពុងព្យាយាមរុញច្រានគូប្រជែងរបស់ខ្លួនចេញពីអឌ្ឍគោលខាងលិច (Western Hemisphere) ស្របពេលដែលពង្រឹងវត្តមានយោធា និងភាពជាដៃគូរបស់ខ្លួននៅទូទាំងទ្វីបអាមេរិក៕
