នៅថ្ងៃអាទិត្យទី១៨.១០.២០២៦ ប្រទេសបារាំង កំពុងរងផលប៉ះពាល់យ៉ាងធ្ងន់ធ្ងរ ដែលបង្កឡើងដោយសារការតវ៉ាដ៏ហិង្សា បណ្តាលឱ្យមនុស្ស ១.៨០០នាក់ត្រូវបានចាប់ខ្លួន អគារសាលាក្រុង ដែលមានប្រវត្តិយូរលង់មួយត្រូវបានដុតបំផ្លាញ ហើយមានករណីលួចប្លន់ទ្រព្យសម្បត្តិ យ៉ាងច្រើនសន្ធឹកសន្ធាប់។
សារព័ត៌មានAFP។
មន្ត្រីរដ្ឋាភិបាលបានពណ៌នាថា កម្រិតធ្ងន់ធ្ងរមិនធ្លាប់មាន បានបង្កើនសម្ពាធកាន់តែខ្លាំងលើប្រធានាធិបតី Emmanuel Macron ដែលកំពុងស្ថិតក្នុងខែចុងក្រោយនៃអាណត្តិរបស់លោក មុនពេលការបោះឆ្នោតជ្រើសរើសអ្នកស្នងតំណែងនឹងមកដល់ក្នុងរយៈពេល៦ ខែទៀត។
ព្រឹត្តិការណ៍នេះ បានកើតឡើងបន្ទាប់ពីមានការតវ៉ារបស់និស្សិត អស់រយៈពេលជាច្រើនសប្តាហ៍ ដែលពេលខ្លះក៏បានប្រែក្លាយទៅជាអំពើហិង្សាផងដែរ។
រដ្ឋមន្ត្រីក្រសួងមហាផ្ទៃ លោក Laurent Nunez បានសរសេរនៅលើបណ្តាញសង្គមX កាលពីថ្ងៃអាទិត្យថា៖ «មនុស្សប្រហែល១.៨០០នាក់ត្រូវបានចាប់ខ្លួន ហើយបច្ចុប្បន្នកំពុងមានការស៊ើបអង្កេតដើម្បីកំណត់អត្តសញ្ញាណអ្នកប្រព្រឹត្ត ដើម្បីនាំពួកគេមកទទួលទោសតាមច្បាប់»។
នៅទីក្រុងប៉ារីស ដែលប៉ូលិសបានរាយការណ៍ថាមានមនុស្សចំនួន៨៥៥ នាក់ត្រូវបានចាប់ខ្លួន(ជាចំនួនខ្ពស់បំផុតមិនធ្លាប់មាន) តាមដងផ្លូវនានាពោរពេញទៅដោយសំណល់នៃរបាំងការពារដែលត្រូវបានដុតបំផ្លាញ។
របាំងទាំងនោះត្រូវបានអ្នកតវ៉ាបង្កើតឡើងដោយប្រើប្រាស់កង់ ធុងសំរាម និងសម្ភារផ្សេងៗទៀត។
នៅតាមដងផ្លូវជាច្រើន មានហាងទំនិញដែលត្រូវបានវាយបំបែកកញ្ចក់ និងមានសំណល់រថយន្តដែលត្រូវបានដុតបំផ្លាញចោល។
លោកស្រី Lamia El Aaraje អភិបាលរងទីក្រុងប៉ារីស បាននិយាយថា រដ្ឋធានីមួយនេះបានជួបប្រទះ «កម្រិតនៃអំពើហិង្សាដែលខ្ញុំជឿថា យើងមិនធ្លាប់ឃើញពីមុនមកឡើយ»។
នៅទីក្រុងប៉ារីស និងទីក្រុងជាច្រើនទៀត រួមមាន Marseille, Bordeaux, Nice និង Strasbourg ហាងទំនិញជាច្រើនត្រូវបានក្រុមយុវជនពាក់ម៉ាស់ចូលលួចប្លន់ក្នុងអំឡុងពេលនៃការតវ៉ា ដែលធ្វើឡើងដើម្បីប្រឆាំងនឹងអតិផរណាកើនឡើងខ្ពស់ និងបញ្ហាថ្លៃចំណាយក្នុងការរស់នៅ។
នៅទីក្រុង Limoges អគារសាលាក្រុងដែលសាងសង់តាំងពីសតវត្សរ៍ទី ១៩ ត្រូវបានភ្លើងឆេះបំផ្លាញ។
លោក Maurice Barate មន្ត្រីរដ្ឋបាលប្រចាំតំបន់ បានប្រាប់ទូរទស្សន៍ LCI ថា អគារនេះត្រូវបានដុតដោយចេតនាដោយ«ក្រុមមនុស្សព្រៃផ្សៃមួយក្រុម»។ ភ្លើងនេះត្រូវបានគ្រប់គ្រងបាននៅព្រឹកព្រលឹមថ្ងៃអាទិត្យ។
មានការចោទប្រកាន់គ្នាទៅវិញទៅមករវាងភាគីនយោបាយផ្សេងៗជុំវិញហេតុការណ៍បំផ្លិចបំផ្លាញនេះ។
រដ្ឋាភិបាលរបស់លោក Macron ដែលប្រកាន់ជំហរកណ្តាល និងលោកស្រី Marine Le Pen បេក្ខជនប្រធានាធិបតីមកពីគណបក្សស្តាំនិយមជ្រុល បានចោទប្រកាន់ក្រុម «ឆ្វេងនិយមជ្រុល»ថា ជាអ្នកបង្កអំពើហិង្សានេះ។
ចំណែកលោក Jean-Luc Melenchon បេក្ខជនប្រធានាធិបតីមកពីគ លោកស្រី Lamia El Aaraje អភិបាលរងទីក្រុងប៉ារីសមកពីគណបក្សសង្គមនិយម បានចោទប្រកាន់គណបក្សរបស់លោកស្រី Le Pen ថាបានបង្កើនភាពតានតឹងជុំវិញការតវ៉ានេះ ដើម្បីបម្រើដល់មហិច្ឆតារបស់លោកស្រី Le Pen ក្នុងការក្លាយជាប្រធានាធិបតីនៅឆ្នាំក្រោយ។
លោកស្រី El Aaraje បាននិយាយថា គណបក្សស្តាំនិយមជ្រុល National Rally កំពុង«ប្រព្រឹត្តដូចជាអ្នកពន្លត់អគ្គិភ័យដែលលួចដុតផ្ទះគេ»។
លោក JD Vance អនុប្រធានាធិបតីសហរដ្ឋអាមេរិក ក៏បានចូលរួមបញ្ចេញមតិលើរឿងនេះដែរ ដោយលើកឡើងថា ភាពចលាចលនេះកើតចេញពីបញ្ហាអន្តោប្រវេសន៍។
លោក Vance បានសរសេរនៅលើបណ្តាញសង្គម Xថា៖«ក្រុមសេរីនិយមលោកខាងលិច បាននាំយកប្រជាជនមកពីពិភពលោកទីបី (ប្រទេសកំពុងអភិវឌ្ឍន៍) ចូលមកក្នុងប្រទេសបារាំង និងប្រទេសដទៃទៀត ដោយយកលេសពីភាពចម្រុះ និងក្តីមេត្តាធម៌។
ពួកគេបានមើលរំលងសំណួរជាមូលដ្ឋានស្តីពីការបញ្ចូលទៅក្នុងសង្គម (assimilation)និងភាពអាចរស់នៅជាមួយគ្នាបាន»៕
