(ប៉ារីស)៖ អ្នកដែលដើរតាមដងផ្លូវធំៗក្នុងទីក្រុងប៉ារីស កាលពីរសៀលថ្ងៃអាទិត្យ(ទី១៨ ខែតុលា) ប្រាកដជាបានទទួលអារម្មណ៍នៃ«ភាពអាម៉ាស់ និងកំហឹង»ដូចដែលប្រធានាធិបតី អេម៉ានុយអែល ម៉ាក្រុង (Emmanuel Macron) បានលើកឡើង បន្ទាប់ពីព្រឹត្តិការណ៍កុបកម្ម កាលពីចុងសប្តាហ៍។
សារព័ត៌មានCNA។
ទ្វារហាងដែលត្រូវបានវាយបំបែក បង្អួចដែលត្រូវបានបិទបាំង ដោយបន្ទះក្តារ និងរបាំងការពារបណ្តោះអាសន្នដែលឆេះខ្ទេច បានបង្ហាញឱ្យឃើញពីអំពើលួចប្លន់ដែលបានកើតឡើងនៅតាមហាងប្រហែល១.៥០០ កន្លែងទូទាំងប្រទេស។
កងកម្លាំងប៉ូលិស ប្រដាប់ដោយឧបករណ៍ការពារជាច្រើននាក់ នៅតែឈរយាមដោយលើកខែលការពារឡើង បន្ទាប់ពីយប់មួយដែលមានមនុស្សរហូតដល់៥០០ នាក់ត្រូវបានចាប់ខ្លួននៅក្នុងរដ្ឋធានីនៃប្រទេសបារាំង។ ហើយនៅចំកណ្តាលនៃភាពវឹកវរនោះ មានមនុស្សម្នាក់ កំពុងកាន់អំបោសបោសសម្អាតបំណែកកញ្ចក់ដែលបែកខ្ចាត់ខ្ចាយដោយស្ងៀមស្ងាត់។
មិនមែនមានតែប្រទេសបារាំងប៉ុណ្ណោះទេដែលកំពុងជួបប្រទះនឹងភាពតានតឹងនេះ។
កំហឹងចំពោះអតិផរណាដែលកំពុងកើនឡើង ចាប់ពីតម្លៃថាមពល រហូតដល់ថ្លៃលំនៅឋាន បានបង្កឱ្យមានការប៉ះទង្គិចគ្នានៅក្នុងប្រទេសអ៊ីតាលី និងព័រទុយហ្គាល់ផងដែរ។
ប្រធានាធិបតី ដូណាល់ ត្រាំ (Donald Trump) បាត់បង់ឱកាសនៅក្នុងការបោះឆ្នោតពាក់កណ្តាលអាណត្តិនៅសហរដ្ឋអាមេរិក។
ដោយសារតែផលប៉ះពាល់នៃសកម្មភាពមិនសមហេតុផលរបស់លោកនៅក្នុងច្រកសមុទ្រហ័រមូស (Strait of Hormuz) ដែលបានជះឥទ្ធិពលដល់តម្លៃប្រេង ខណៈដែលលោកព្យាយាមបង្វែរចំណាប់អារម្មណ៍សាធារណជនដោយចង្អុលបង្ហាញទៅកាន់ទីក្រុងប៉ារីសទៅវិញ។
ទោះជាយ៉ាងណាក៏ដោយ ទំនោររបស់ប្រទេសបារាំងក្នុងការធ្លាក់ចូលទៅក្នុងភាពចលាចលបានក្លាយជារឿងកើតឡើងញឹកញាប់គួរឱ្យព្រួយបារម្ភ ស្របពេលដែលរដ្ឋបាលរបស់លោក ម៉ាក្រុង ហាក់ដូចជាមិនអាចគ្រប់គ្រងស្ថានការណ៍បាន។
ចំណុចនេះនាំឱ្យមានសំណួរថា៖ ហេតុអ្វីបានជាប្រទេសមួយក្នុងចំណោមប្រទេសអ្នកមានដែលចំណាយថវិកាសាធារណៈច្រើនជាងគេបំផុតលើពិភពលោកមួយនេះ ត្រូវធ្លាក់ចូលក្នុងភ្លើងនៃអំពើហិង្សាម្តងទៀត?
ទន្ទឹមនឹងនេះ ការស្ទង់មតិបានបង្ហាញថា ប្រជាជនបារាំងជាមធ្យមខ្វះខាតថវិកាប្រហែល ៥០០ អឺរ៉ូក្នុងមួយខែ ដើម្បីទូទាត់ការចំណាយប្រចាំថ្ងៃរបស់ពួកគេឱ្យបានសមរម្យ ដែលធ្វើឱ្យពួកគេងាយរងផលប៉ះពាល់នៅពេលមានការផ្លាស់ប្តូរភ្លាមៗនៅក្នុងស្ថានភាពសេដ្ឋកិច្ចរបស់ពួកគេ ហើយក៏ងាយនឹងងាកទៅរកការតវ៉ាផងដែរ។
បើនិយាយឱ្យចំទៅ ដើមហេតុដែលបង្កឱ្យមានអំពើហិង្សានៅពេលនេះ រួមមានការបរាជ័យផ្នែកនយោបាយមួយចំនួនក្នុងរយៈពេលខ្លី ដែលមានលក្ខណៈស្រដៀងគ្នាទៅនឹងព្រឹត្តិការណ៍កុបកម្ម «អាវកាក់ពណ៌លឿង» (Yellow Vest) កាលពីឆ្នាំ ២០១៨។
អាជ្ញាធរហាក់ដូចជាមិនបានរំពឹងទុកថា នឹងមានមនុស្សជាងកន្លះលាននាក់ចេញមកតាមដងផ្លូវទូទាំងប្រទេសនោះ៕
