ក្រុមអ្នកបង្កកុបកម្ម បានប៉ះទង្គិចជាមួយប៉ូលិស ដោយដុតរថយន្ត សម្រុកចូលអគារសាធារណៈ និងដុតបំផ្លាញសាលាក្រុងប្រវត្តិសាស្ត្រមួយកន្លែង។
នេះគឺជាភាពចលាចលស៊ីវិល ដ៏អាក្រក់បំផុតនៅប្រទេសបារាំង ក្នុងរយៈពេលប៉ុន្មានឆ្នាំចុងក្រោយនេះ។
ខណៈដែលអំពើហិង្សា និងការលួចប្លន់បានកើតឡើងនៅតាមទីក្រុងធំៗជាច្រើន អំឡុងពេលមានការតវ៉ាទូទាំងប្រទេស។
សារព័ត៌មាន(AP)នៅថ្ងៃទី២០.១០.២០២៦។
មនុស្សប្រហែល ២.៤០០នាក់ត្រូវបានចាប់ខ្លួនកាលពីចុងសប្តាហ៍ ហើយអាជ្ញាធរបានឱ្យដឹងថា អាជីវកម្មរាប់ពាន់កន្លែងត្រូវបានខូចខាត ឬត្រូវគេលួចប្លន់។
អំពើកុបកម្មទាំងនេះបានបិទបាំងការតវ៉ាប្រឆាំង នឹងការកើនឡើងនៃថ្លៃចំណាយលើការរស់នៅ និងលក្ខខណ្ឌមិនល្អនៅក្នុងសាលារៀន ដែលមានមនុស្សរាប់សែននាក់បានចូលរួមដើរហែក្បួនដោយសន្តិវិធី។
ប្រធានាធិបតី Emmanuel Macron បានថ្កោលទោសចំពោះ«អំពើហិង្សាដែលគ្មានការទប់ស្កាត់»ដែលបង្កឡើងដោយ «ក្រុមបះបោរមកពីក្រុមជ្រុលនិយមឆ្វេង រួមជាមួយឧក្រិដ្ឋជនជាច្រើននាក់ទៀត»។
អង្គការនិស្សិត និងសិស្សវិទ្យាល័យ បានអំពាវនាវឱ្យមានការតវ៉ាបន្ថែមទៀតនៅថ្ងៃព្រហស្បតិ៍ និងថ្ងៃសៅរ៍។
ក្រុមសម្របសម្រួលសិស្សវិទ្យាល័យថ្នាក់ជាតិ បានជំរុញឱ្យយុវជន«ចេញមកតាមដងផ្លូវ»ហើយបានគាំទ្រដល់ការបន្តបិទផ្លូវ និងការធ្វើបាតុកម្មនានា។
ក្រុមសកម្មជនមួយក្រុម ដែលព្យាយាមរស់ឡើងវិញនូវចលនា«អាវកាក់ពណ៌លឿង» (Yellow Vests) ឆ្នាំ ២០១៨ ដើម្បីប្រឆាំងនឹងភាពអយុត្តិធម៌ក្នុងសង្គម ក៏បានប្រកាសពីគម្រោងធ្វើបាតុកម្មទូទាំងប្រទេសនៅថ្ងៃសៅរ៍ ក្រោមពាក្យស្លោកថា «Macron ត្រូវតែចុះចេញពីតំណែង»។
អំពើហិង្សានេះ គឺស្រដៀងគ្នាទៅនឹងអំពើកុបកម្មដែលបានញាំញីប្រទេសបារាំងកាលពីមួយទសវត្សរ៍មុន។
លោក Sebastian Roché សាស្ត្រាចារ្យស្រាវជ្រាវនៅវិទ្យាស្ថាននយោបាយ Sciences Po Grenoble ដែលសិក្សាអំពីការងារប៉ូលិស បាននិយាយថា កម្រិតនៃការខូចខាតគឺប្រហាក់ប្រហែលនឹងអ្វីដែលបានកើតឡើងក្នុងអំឡុងពេលកំពូលនៃចលនា«អាវកាក់ពណ៌លឿង»ដែរ។
ចលនានេះ ដែលដំបូងឡើយកើតឡើងដោយសារការប្រឆាំងនឹងការដំឡើងពន្ធលើប្រេងឥន្ធនៈ បាននាំឱ្យមានការតវ៉ាជាបន្តបន្ទាប់ប្រឆាំងនឹងរដ្ឋាភិបាលរបស់លោក Macron។
ការតវ៉ាមួយចំនួនបានប្រែក្លាយទៅជាអំពើហិង្សា ដោយមានការដុតរថយន្ត ការលួចប្លន់ហាងទំនិញ និងការបំផ្លិចបំផ្លាញវិមាន Arc de Triomphe ក្នុងអំឡុងពេលមានការប៉ះទង្គិចគ្នានៅទីក្រុងប៉ារីស។
លោក Roché បាននិយាយថា៖ «បើនិយាយពីការបំផ្លិចបំផ្លាញ និងការខូចខាត វាប្រហែលជាស្រដៀងគ្នាទៅនឹងអ្វីដែលបានកើតឡើងក្នុងរយៈពេលពីរចុងសប្តាហ៍ដំបូងនៃខែធ្នូ ឆ្នាំ ២០១៨»៕
