កាសែត The Washington Post បានរាយការណ៍កាលពីថ្ងៃចន្ទទី១៩.១០.២០២៦ថា សហរដ្ឋអាមេរិក បានពន្យារពេលការអនុម័តលើការផ្ទេរមីស៊ីលស្ទាក់ចាប់ (interceptor missiles) ប្រភេទ Patriot ដែលអ៊ុយក្រែនត្រូវការសម្រាប់ការពារខ្លួន ប្រឆាំងនឹងការវាយប្រហារដោយមីស៊ីល និងយន្តហោះដ្រូនរបស់រុស្ស៊ី។
សារព័ត៌មានTRT។
យោងតាមរបាយការណ៍នេះ រដ្ឋមន្ត្រីក្រសួងការពារជាតិ លោក Pete Hegseth មិនទាន់បានបដិសេធជាផ្លូវការចំពោះសំណើផ្ទេរមីស៊ីលទាំងនេះទេ ប៉ុន្តែលោកក៏មិនទាន់បានបញ្ចប់នីតិវិធីចាំបាច់ដើម្បីផ្តល់ការអនុញ្ញាតដែរ។
ការពន្យារពេលនេះកើតឡើងចំពេលដែលមានភាពតានតឹងឡើងវិញរវាងប្រធានាធិបតី Donald Trump និងសមភាគីអ៊ុយក្រែន លោក Volodymyr Zelenskyy ព្រមទាំងការធ្លាក់ចុះនៃទំនាក់ទំនងជាទូទៅរវាងទីក្រុងវ៉ាស៊ីនតោន និងទីក្រុងគៀវ។
របាយការណ៍ដដែលនេះ ដោយដកស្រង់សម្តីមន្ត្រីអាមេរិកម្នាក់ និងបុគ្គលបីនាក់ផ្សេងទៀតដែលដឹងពីស្ថានភាពនេះ បានបញ្ជាក់ថា មីស៊ីល Patriot មួយចំនួនដែលគ្រោងនឹងផ្ទេរនោះ គឺមកពីបណ្តាប្រទេសដែលជាមិត្តនឹងអ៊ុយក្រែន ហើយការផ្ទេរទាំងនេះតម្រូវឱ្យមានការអនុម័តពីលោក Hegseth។
មន្ត្រីអ៊ុយក្រែនម្នាក់ បានប្រាប់កាសែត The Washington Post កាលពីសប្តាហ៍មុនថា អ៊ុយក្រែននៅសល់មីស៊ីល Patriot តែ«មួយចំនួនតូច» ប៉ុណ្ណោះនៅក្នុងស្តុក ដែលនេះបង្ហាញឱ្យឃើញពីក្តីបារម្ភអំពីលទ្ធភាពទទួលបានគ្រាប់រំសេវសម្រាប់ប្រព័ន្ធការពារដែនអាកាសរបស់ប្រទេសនេះ។
របាយការណ៍បានកត់សម្គាល់ថា លោក Hegseth នៅតែបន្តអនុម័តជំនួយមួយចំនួនរបស់សហរដ្ឋអាមេរិកទៅកាន់អ៊ុយក្រែន ដែលបង្ហាញថា ការពន្យារពេលលើការផ្ទេរមីស៊ីលនេះ មិនមែនមានន័យថាជាការបញ្ឈប់ការគាំទ្រពីអាមេរិកទាំងស្រុងនោះទេ។
ការពន្យារពេលនេះកើតឡើងនៅពេលដែលទំនាក់ទំនងរវាងលោក Trump និងលោក Zelenskyy កំពុងជួបភាពតានតឹងម្តងទៀត ដោយក្នុងរយៈពេលប៉ុន្មានថ្ងៃថ្មីៗនេះ លោក Trump បានរិះគន់ប្រធានាធិបតីអ៊ុយក្រែនរូបនេះជាច្រើនលើក៕
