លោក Elon Musk បាននិយាយកាលពីថ្ងៃអង្គារទី២០ ខែតុលា ឆ្នាំ២០២៦ថា ការរួមបញ្ចូលគ្នារវាងក្រុមហ៊ុនទាំងពីរ របស់លោក គឺ SpaceX និងTesla នឹងក្លាយជា«គំនិតល្អមួយ»។
សារព័ត៌មាន(Reuters)។
លោកបញ្ជាក់ថា ក្រុមហ៊ុនទាំងពីរ បានបង្កើតគណៈកម្មាធិការពិសេសដើម្បីពិភាក្សាអំពីការរួមបញ្ចូលគ្នានេះ ដែលធ្វើឱ្យតម្លៃភាគហ៊ុនរបស់ក្រុមហ៊ុនបច្ចេកវិទ្យា និងអវកាសមួយនេះកើនឡើង៨% នៅក្នុងការជួញដូរក្រៅម៉ោងផ្លូវការ។
កាលពីពេលមុន ក្រុមហ៊ុននេះបានប្រកាសពីប្រាក់ចំណេញលើកដំបូងរបស់ខ្លួនក្នុងនាមជាក្រុមហ៊ុនសាធារណៈ។
លោក Musk បាននិយាយថា លោករំពឹងថាប្រាក់ចំណូលប្រចាំឆ្នាំនឹងមានចន្លោះពី៥០០ ពាន់លានដុល្លារ ទៅ ១ ទ្រីលានដុល្លារ នៅត្រឹមចុងឆ្នាំ ២០២៧ ដោយសារតម្រូវការកន្លែងសម្រាប់មជ្ឈមណ្ឌលទិន្នន័យ (data-center space) កំពុងកើនឡើងយ៉ាងខ្លាំង ស្របពេលជាមួយនឹងការរីកចម្រើនយ៉ាងឆាប់រហ័សនៃបច្ចេកវិទ្យាបញ្ញាសិប្បនិម្មិត (AI)។
កន្លងមកលោក Musk ធ្លាប់បានលើកឡើងពីគំនិតនៃការរួមបញ្ចូល SpaceX និង Tesla ទៅកាន់ម្ចាស់ភាគហ៊ុន ដោយសំដៅលើចំណុចត្រួតស៊ីគ្នា (overlap)ដែលកាន់តែច្រើនឡើងរវាងក្រុមហ៊ុនទាំងពីរ។
ការសន្និដ្ឋាន ឬការប៉ាន់ស្មានថា ក្រុមហ៊ុនអវកាសមួយនេះអាចនឹងទិញយកក្រុមហ៊ុនផលិតរថយន្តអគ្គិសនី (EV) ខាងលើ បានក្លាយជាប្រធានបទដែលគេចាប់អារម្មណ៍កាន់តែខ្លាំងនាពេលថ្មីៗនេះ។
ធនាគារ Barclays បានលើកឡើងកាលពីសប្តាហ៍មុនថា កិច្ចព្រមព្រៀងមួយអាចនឹងត្រូវបានប្រកាសមុនកិច្ចប្រជុំប្រចាំឆ្នាំរបស់ Tesla នៅខែធ្នូ។
លោក Musk បានថ្លែងប្រាប់វិនិយោគិននៅក្នុងកិច្ចប្រជុំតាមទូរសព្ទមួយថា៖«ខ្ញុំគិតថាវាជាគំនិតល្អមួយ ប៉ុន្តែវាអាស្រ័យទៅលើគណៈកម្មាធិការពិសេសរបស់ក្រុមហ៊ុនទាំងពីរ»។
នេះគឺជាការបញ្ជាក់ជាផ្លូវការលើកដំបូងថា ក្រុមហ៊ុនទាំងពីរកំពុងពិភាក្សាគ្នាជាផ្លូវការ។
លោកបានបន្ថែមថា៖ «ដោយសារខ្ញុំជាភាគីដែលមានផលប្រយោជន៍ពាក់ព័ន្ធ (conflicted party) ខ្ញុំមិនអាចចូលរួមក្នុងការពិភាក្សារបស់គណៈកម្មាធិការពិសេសទាំងនេះបានទេ»។
គណៈកម្មាធិការទាំងនេះត្រូវបានបង្កើតឡើងដោយមានសមាជិកជាក្រុមប្រឹក្សាភិបាលឯករាជ្យ។
លោកបានបន្ថែមថា ក្រុមហ៊ុនទាំងពីរបានបង្កើតគណៈកម្មាធិការពិសេសទាំងនេះឡើងតាមសំណើរបស់ម្ចាស់ភាគហ៊ុន ដែលជាអ្នកនឹងត្រូវសម្រេចចិត្តអនុម័តលើកិច្ចព្រមព្រៀងនេះនៅទីបំផុត។
លោកនិយាយថា៖ «ខ្ញុំពិតជាគិតថាមានអត្ថប្រយោជន៍ច្រើនក្នុងការរួមបញ្ចូលក្រុមហ៊ុនទាំងនេះ ព្រោះបច្ចុប្បន្នយើងកំពុងស្ថិតនៅក្នុងដំណាក់កាលដែលហៅថា ‘superintelligence singularity’ (ចំណុចដែលបញ្ញាសិប្បនិម្មិតវិវត្តទៅដល់កម្រិតខ្ពស់បំផុត)។
ការសហការគ្នានឹងផ្តល់ផលប្រយោជន៍ច្រើន ដូចជាការអភិវឌ្ឍកម្មវិធីបញ្ញាសិប្បនិម្មិតកម្រិតខ្ពស់ (superintelligence software) ការរចនាបន្ទះឈីប (chip design) ប្រព័ន្ធ Terafab បច្ចេកវិទ្យាគ្រឿងយន្ត (robotics) ការដឹកជញ្ជូនវត្ថុទៅកាន់គន្លងផែនដីតាមរយៈបណ្តាញផ្កាយរណប Starmind និងប្រព័ន្ធតភ្ជាប់ទំនាក់ទំនងផ្សេងៗ»។
លោក Musk បានលើកឡើងនៅក្នុងកិច្ចសន្ទនានោះថា Terafab ដែលជាក្រុមហ៊ុនបណ្តាក់ទុនរួមគ្នារវាងក្រុមហ៊ុនទាំងពីរសម្រាប់ការផលិតបន្ទះឈីប (chip)គ្រោងនឹងផលិតបន្ទះឈីបសាកល្បងដំបូងនៅអំឡុងខែឧសភា ឬខែមិថុនា ឆ្នាំក្រោយ ហើយមានគោលដៅឈានដល់ការផលិតក្នុងបរិមាណច្រើននៅត្រីមាសទីបីនៃឆ្នាំ ២០២៨។
លោក Musk បានបន្ថែមថា វានៅលឿនពេកក្នុងការសន្មតថាការរួមបញ្ចូលគ្នារវាងក្រុមហ៊ុន SpaceX និង Tesla នឹងកើតឡើង ដោយលោកបានបញ្ជាក់ថា គណៈកម្មាធិការពិសេសនានានៅមិនទាន់បានព្រមព្រៀងគ្នាលើលក្ខខណ្ឌនៃប្រតិបត្តិការនេះទេ ហើយក៏អាចនឹងមិនឈានដល់ការព្រមព្រៀងគ្នានោះឡើយ។ ភាគហ៊ុនរបស់ក្រុមហ៊ុនTesla បានកើនឡើង១,៨% នៅក្នុងការជួញដូរក្រៅម៉ោងផ្លូវការ៕
