ប្រភពពីមន្ទីរពេទ្យបានឱ្យដឹងថា ការវាយប្រហាររបស់អ៊ីស្រាអែល កាលពីថ្ងៃពុធទី២១.១០.២០២៦ បានសម្លាប់ជនជាតិប៉ាឡេស្ទីន ៣នាក់ និងធ្វើឱ្យមនុស្សជាច្រើនទៀតរងរបួសនៅទូទាំងតំបន់ហ្គាហ្សា ក្នុងនោះកុមារអាយុ១០ឆ្នាំម្នាក់បានស្លាប់។
សារព័ត៌មានAnadolu។
ចំនួនអ្នកស្លាប់និងរបួសចុងក្រោយនេះ បានកើតឡើង ទោះបីជាមានកិច្ចព្រមព្រៀងបទឈប់បាញ់ ចូលជាធរមានចាប់តាំងពីថ្ងៃទី១០ ខែតុលា ឆ្នាំ២០២៥ ក៏ដោយ។
ប៉ុន្តែអ៊ីស្រាអែល បានរំលោភលើកិច្ចព្រមព្រៀងនេះជាច្រើនលើកតាមរយៈការវាយប្រហារនានា ដែលបានសម្លាប់ និងធ្វើឱ្យជនជាតិប៉ាឡេស្ទីនរាប់ពាន់នាក់រងរបួស។
ប្រភពពីមន្ទីរពេទ្យមួយបានប្រាប់ទីភ្នាក់ងារព័ត៌មានAnadolu ថា ជនជាតិប៉ាឡេស្ទីន២ នាក់បានស្លាប់ និងជាច្រើននាក់ទៀតរងរបួស (ក្នុងនោះម្នាក់រងរបួសធ្ងន់ធ្ងរ) នៅពេលដែលយន្តហោះដ្រូនរបស់អ៊ីស្រាអែលបានវាយប្រហារទៅលើកង់អគ្គិសនីមួយគ្រឿង នៅជិតផ្លូវ al-Sinaa ក្នុងផ្នែកខាងលិចនៃទីក្រុងហ្គាហ្សា។
សាក្សីបាននិយាយថា ការវាយប្រហារនោះបានចំកង់នៅជិតផ្លូវបំបែក al-Sinaa ដោយបានសម្លាប់អ្នកជិះកង់ និងអ្នកដំណើរម្នាក់ទៀតដែលកំពុងដើរកាត់ទីនោះ។
យោងតាមអ្នកយកព័ត៌មានរបស់ Anadolu តំបន់ដែលរងការវាយប្រហារនោះគឺជាតំបន់ដែលមានប្រជាជនរស់នៅយ៉ាងកុះករ និងហ៊ុមព័ទ្ធទៅដោយតង់ដែលជាជម្រករបស់ជនជាតិប៉ាឡេស្ទីនដែលត្រូវភៀសខ្លួនចេញពីលំនៅឋាន។
សាក្សីបាននិយាយថា នៅភាគខាងត្បូងតំបន់ហ្គាហ្សា ស្ត្រីម្នាក់បានរងរបួសដោយសារការបាញ់ប្រហារពីសំណាក់កងទ័ពអ៊ីស្រាអែល នៅជិតទីក្រុង Hamad ស្ថិតនៅភាគខាងជើងនៃទីក្រុង Khan Younis។
មុននេះនៅថ្ងៃពុធ ប្រភពពីមន្ទីរពេទ្យបានប្រាប់ Anadolu ថា លោក Ramadan Mohammed Abu Shahada ត្រូវបានសម្លាប់ ហើយជនជាតិប៉ាឡេស្ទីនម្នាក់ទៀតបានរងរបួស នៅក្នុងការវាយប្រហារដោយយន្តហោះដ្រូនរបស់អ៊ីស្រាអែល នៅតំបន់ al-Mawasi នៃ al-Qarara ភាគខាងជើងទីក្រុង Khan Younis។
ប្រភពដដែលបានឱ្យដឹងថា នៅទីក្រុងហ្គាហ្សា កុមារឈ្មោះ Abdul Rahman Khalil Awad អាយុ ១០ ឆ្នាំ បានស្លាប់ដោយសាររបួសដែលទទួលបានកាលពី ២ថ្ងៃមុន នៅក្នុងការវាយប្រហាររបស់អ៊ីស្រាអែលលើសង្កាត់ Sheikh Radwan នៅភាគខាងជើងនៃទីក្រុងនេះ។
សាក្សីបានរាយការណ៍ថា នៅព្រឹកថ្ងៃពុធ កប៉ាល់របស់កងទ័ពជើងទឹកអ៊ីស្រាអែលបានបើកការបាញ់ប្រហារដោយកាំភ្លើងយន្តនៅឯឆ្នេរសមុទ្រនៃទីក្រុងហ្គាហ្សា ដែលរំខានដល់សកម្មភាពនេសាទរបស់ជនជាតិប៉ាឡេស្ទីន។
គេក៏បានរាយការណ៍ផងដែរអំពីការបាញ់ប្រហារ និងការបាញ់ផ្លោងកាំភ្លើងធំជាបន្តបន្ទាប់ នៅភាគខាងកើតទីក្រុងហ្គាហ្សា និងនៅជំរុំជនភៀសខ្លួន Jabalia ក្នុងភាគខាងជើងតំបន់ហ្គាហ្សា ដែលជាតំបន់ស្ថិតក្រោមការគ្រប់គ្រងរបស់យោធាអ៊ីស្រាអែល។
យុទ្ធនាការយោធ យោងតាមតួលេខចុងក្រោយពីក្រសួងសុខាភិបាលនៅតំបន់ហ្គាហ្សា ការរំលោភលើបទឈប់បាញ់ដោយភាគីអ៊ីស្រាអែល បានសម្លាប់ជនជាតិប៉ាឡេស្ទីនចំនួន ១.៥៣៤ នាក់ និងធ្វើឱ្យមនុស្ស ៥.៤៨៦ នាក់ផ្សេងទៀតរងរបួស៕
