អាជ្ញាធរអាកាសចរស៊ីវិលរបស់ប្រទេសអារ៉ាប៊ីសាអូឌីត បានឱ្យដឹងថា មនុស្សម្នាក់បានស្លាប់ និង៨នាក់ផ្សេងទៀតបានរងរបួស នៅក្នុងការវាយប្រហារមួយលើអាកាសយានដ្ឋានអន្តរជាតិKing Fahd ក្នុងទីក្រុង Dammam ភាគខាងកើតនៃប្រទេសអារ៉ាប៊ីសាអូឌីត កាលពីយប់ថ្ងៃទី២១.១០.២០២៦។
សារព័ត៌មានTRT។
អាជ្ញាធរបន្ថែមថា ការវាយប្រហារកាលពីយប់ថ្ងៃពុធនោះ ក៏បានបង្កការខូចខាតដល់ទ្រព្យសម្បត្តិផងដែរ ដែលបច្ចុប្បន្នកំពុងស្ថិតក្នុងដំណាក់កាលវាយតម្លៃ ហើយព័ត៌មានលម្អិតបន្ថែមនឹងត្រូវបានជូនដំណឹងនៅពេលក្រោយ។
មុននេះបន្តិចក្នុងថ្ងៃដដែល ក្រសួងថាមពលរបស់អារ៉ាប៊ីសាអូឌីត បានរាយការណ៍ថា មនុស្ស ២នាក់បានស្លាប់ និង២នាក់ទៀតបានរងរបួស ដោយសារបំណែកដែលធ្លាក់ចុះមកក្រោម បន្ទាប់ពីប្រព័ន្ធការពារដែនអាកាសបានស្ទាក់ចាប់យន្តហោះដ្រូនមួយគ្រឿង ដែលមានគោលដៅវាយប្រហារលើទីតាំងរបស់ក្រុមហ៊ុន Aramco ក្នុងតំបន់ប្រេង Shaybah នៃខេត្តភាគខាងកើត (Eastern Province)។
បំណែកទាំងនោះបានបង្កឱ្យមានអគ្គិភ័យឆេះយានយន្តមួយគ្រឿងរបស់ក្រុមហ៊ុនម៉ៅការ ប៉ុន្តែក្រសួងបានបញ្ជាក់ថា សកម្មភាពប្រតិបត្តិការនៅតំបន់ប្រេងនោះមិនរងផលប៉ះពាល់ឡើយ។
សម្ព័ន្ធភាពដឹកនាំដោយអារ៉ាប៊ីសាអូឌីត ក៏បានប្រកាសកាលពីថ្ងៃពុធដែរថា ខ្លួនបានស្ទាក់ចាប់ និងបំផ្លាញយន្តហោះដ្រូនចំនួន ៥គ្រឿង ដែលត្រូវបានបាញ់សំដៅមកកាន់ព្រះរាជាណាចក្រនេះ រួមទាំងនៅក្នុងខេត្តភាគខាងកើត និងតំបន់ Medina ផងដែរ។
ក្រុមឧទ្ទាម Houthi ធ្លាប់បានវាយប្រហារលើអាកាសយានដ្ឋានអន្តរជាតិ King Fahd ម្តងរួចមកហើយកាលពីថ្ងៃទី១១ ខែតុលា ដែលនាំឱ្យមានការវាយតម្លៃការខូចខាត និងការត្រួតពិនិត្យសុវត្ថិភាព។
ហេតុការណ៍ទាំងនេះកើតឡើងចំពេលដែលមានការកើនឡើងនៃអរិភាពរវាងក្រុមឧទ្ទាម Houthi របស់ប្រទេសយេម៉ែន និងសម្ព័ន្ធភាពដឹកនាំដោយអារ៉ាប៊ីសាអូឌីត រួមទាំងការវាយប្រហារសំដៅលើអាកាសយានដ្ឋាន និងទីតាំងថាមពលនានារបស់អារ៉ាប៊ីសាអូឌីត។
ប្រទេសយេម៉ែន បានជួបប្រទះនឹងការផ្ទុះឡើងវិញនៃការប្រយុទ្ធគ្នាចាប់តាំងពីខែកក្កដាមក រវាងកងកម្លាំងរដ្ឋាភិបាល និងក្រុមឧទ្ទាម Houthi បន្ទាប់ពីរយៈពេលស្ងប់ស្ងាត់មួយរយៈក្រោមបទឈប់បាញ់ដែលបានចាប់ផ្តើមនៅខែមេសា ឆ្នាំ២០២២។
ជម្លោះនេះបានចាប់ផ្តើមនៅក្នុងខែកញ្ញា ឆ្នាំ២០១៤ នៅពេលដែលក្រុមឧទ្ទាម Houthi បានចូលកាន់កាប់រដ្ឋធានី Sanaa និងខេត្តផ្សេងៗទៀតមួយចំនួន៕
