កងទ័ពអ៊ីស្រាអែលបានបាញ់សម្លាប់ជនជាតិប៉ាឡេស្ទីន ២ នាក់ នៅព្រឹកថ្ងៃសុក្រ ទី២៣ ខែតុលា ឆ្នាំ២០២៦ ក្នុងតំបន់វេសប៊ែងដែលអ៊ីស្រាអែលកំពុងកាន់កាប់។
សារព័ត៌មានAnadolu។
យោងតាមសារព័ត៌មានអ៊ីស្រាអែល Haaretz ជនជាតិប៉ាឡេស្ទីនទាំងពីរនាក់ត្រូវបានសម្លាប់ក្នុងការបាញ់តបតជាមួយកងទ័ពអ៊ីស្រាអែល បន្ទាប់ពីមានការចោទប្រកាន់ថា ពួកគេបានបាញ់ប្រហារលើជនជាតិអ៊ីស្រាអែលនៅទីក្រុងហេប្រុន បណ្ដាលឱ្យមនុស្ស ៥ នាក់រងរបួស។ ក្នុងចំណោមអ្នករងរបួសទាំងនោះ មាន ២ នាក់ស្ថិតក្នុងស្ថានភាពធ្ងន់ធ្ងរ។
ក្រោយហេតុការណ៍នេះ កងទ័ពអ៊ីស្រាអែលបានបិទខ្ទប់ភូមិប៉ាឡេស្ទីនមួយចំនួននៅក្បែរទីក្រុងហេប្រុន។
ហេតុការណ៍នេះកើតឡើង ខណៈការវាយប្រហាររបស់ជនជាតិអ៊ីស្រាអែលដែលរស់នៅក្នុងតំបន់តាំងទីលំនៅ និងកងទ័ពអ៊ីស្រាអែលលើប្រជាជនប៉ាឡេស្ទីន កំពុងកើនឡើងក្នុងរដូវប្រមូលផលអូលីវ។
តាមតួលេខប៉ាឡេស្ទីន ជនជាតិអ៊ីស្រាអែលប្រមាណ ៧៥ ម៉ឺននាក់ កំពុងរស់នៅក្នុងតំបន់វេសប៊ែង រួមទាំងក្រុងហ្សេរុយសាឡឹមខាងកើត ដែលអ៊ីស្រាអែលកាន់កាប់។ ពួកគេរស់នៅក្នុងតំបន់តាំងទីលំនៅចំនួន ១៩៤ និងទីតាំងតាំងទីលំនៅតូចៗប្រមាណ ៤០០ កន្លែង។
តំបន់តាំងទីលំនៅរបស់អ៊ីស្រាអែលដែលសាងសង់លើដីប៉ាឡេស្ទីនដែលត្រូវបានកាន់កាប់ ត្រូវបានចាត់ទុកថាខុសច្បាប់ក្រោមច្បាប់អន្តរជាតិ៕
