ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានប្រកាសនៅថ្ងៃទី២៣ ខែតុលា ឆ្នាំ២០២៦ ថា អ៊ុយក្រែននឹងសហការជាមួយក្រុមហ៊ុនហ្វាំងឡង់ ដើម្បីបង្កើតប្រព័ន្ធទំនាក់ទំនងតាមផ្កាយរណបផ្ទាល់ខ្លួន ដើម្បីពង្រឹងការការពារជាតិ។
សារព័ត៌មានAl Jazeera។
ការសម្រេចចិត្តនេះធ្វើឡើង ខណៈអ៊ុយក្រែននៅតែជួបបញ្ហាជាមួយប្រព័ន្ធផ្កាយរណបយោធា Starshield របស់សហរដ្ឋអាមេរិក ដែលមានសារៈសំខាន់សម្រាប់ការប្រយុទ្ធ និងការការពារដែនអាកាសពីការវាយប្រហាររបស់រុស្ស៊ី។
លោក ហ្សេឡេនស្គី បានឱ្យដឹងថា អ៊ុយក្រែនបានព្រមព្រៀងសហការជាមួយក្រុមហ៊ុន Nokia និង ICEYE របស់ហ្វាំងឡង់ ដើម្បីប្រើប្រាស់បច្ចេកវិទ្យាផ្កាយរណបរបស់ប្រទេសនេះឱ្យបានកាន់តែច្រើន។ កិច្ចសហការនេះក៏នឹងជួយគាំទ្រដល់ការដឹកជញ្ជូន និងវិស័យថាមពលរបស់អ៊ុយក្រែន ដែលកំពុងរងការវាយប្រហារពីរុស្ស៊ី។
ក្រុមហ៊ុន ICEYE បានបញ្ជាក់ថា អ៊ុយក្រែនត្រូវការប្រព័ន្ធទំនាក់ទំនងតាមផ្កាយរណបដែលមានសុវត្ថិភាព និងអាចគ្រប់គ្រងដោយខ្លួនឯងបាន។
ផែនការនេះបង្ហាញថា អ៊ុយក្រែនកំពុងស្វែងរកមធ្យោបាយកាត់បន្ថយការពឹងផ្អែកលើប្រព័ន្ធផ្កាយរណបរបស់អាមេរិក ខណៈសង្គ្រាមជាមួយរុស្ស៊ីនៅតែបន្ត និងមានការព្រួយបារម្ភអំពីការគាំទ្ររបស់រដ្ឋបាលលោក ដូណាល់ ត្រាំ ចំពោះអ៊ុយក្រែន៕
